Cada quince días, por volta de vinte mulleres entran pola porta dun mercado da Coruña. Horas despois, cando saen, o debate fica servido.
Na peixaria, na chacinaria, no posto das verduras, onde venden o queixo... consumidor@s e vendedor@s dedican ao aborto e aos dereitos sexuais e reprodutivos o que noutrora eran conversas sobre o tempo ou o estado de saúde da familia.
"Esa era a idea, levar o debate ás rúas, á xente que non se achega a nós porque ouvir 'feminismo' bota para atrás, ora por prexuízos ora por ignorancia", explica Marta Casal, unha das activistas que están a percorrer os mercados e as prazas da cidade herculina para coñeceren o que é que o pobo sabe a respeito dunha contra-reforma que o ministro Gallardón filtrou á imprensa mais non puxo aínda por escrito.
As primeiras sospeitas a respeito deste retroceso anunciado nos dereitos sexuais e reprodutivos --o PP chegou ao Goberno español o 20 de Novembro de 2011-- xa levara en 2012 as feministas da Coruña a tirar proveito dos días de sol de agosto para sentaren beira mar e conversar non só sobre o aborto, senón tamén sobre as distintas formas de violencia que sofren as mulleres e sobre a Lei de Familia, redactada pola Red Madre --literalmente, a través dunha ILP-- e aprobada pola maioría do PP no Parlamento galego.
"Descoloca moito porque somos un grupo de mulleres sen dependencia nen afiliación a nengún partido político"
"Descoloca moito porque somos un grupo de mulleres sen dependencia nen afiliación a nengún partido político, que é o primeiro que queren saber de nós; a xente pensa que unha feminista é unha vangardista, unha cousa moi rara, mais despois de falaren connosco ven que non hai nada diso, que as nosas preocupacións son as mesmas que as delas --fala d@s usuari@s dun mercado de abastos-- e que podemos ter unha conversa agradábel".
Di Casal que a participación da cidadanía "é extraordinaria, mesmo de persoas que xa de entrada se declaran conservadoras e antiabortistas" e que os argumentos que a respeito do aborto manexa a xente nas rúas "vai máis aló do suposto de malformación" e, nomeadamente as mulleres, teñen claro que "estamos a ser usadas para non falar doutras cousas".
O máis importante desta maneira de facer activismo é "recibir feedback", retroalimentación que recollen e que servirá para unha segunda tarefa: debates máis concretos centrados nas temáticas que van saíndo nestas conversas nos mercados e nas prazas.
Conversas serias que decorren entre a raiba e a festa
"Falamos con mulleres moi maiores que nos contan historias tremendas de como abortaron elas, ou unha familiar ou unha amiga", conta Marta Casal, afeita xa a ouvir testemuños duros que non son patrimonio da memoria dunha soa muller, senón de moitas, e que, malia os anos transcorridos, posúen plena vixencia nos nosos días.
Así as cousas, este 8 de Marzo na Coruña será unha xornada de festa rachada.
Unha comparsa de antroido escenificará a briga verbal entre beatas e heroicas feministas na Praza de Lugo, terceira experiencia após o Mercado das Conchiñas (8 de febreiro) e Praza de San Agustín (22 de febreiro).
Tanto ten quen gañe a briga. As feministas da Coruña teñen claro que o único importante é "estarmos nas rúas".