A Policía Local de Ponteareas investiga os danos causados en diferentes bens municipais a través dunhas pintadas en contra do Goberno local na que se pode ler: "bnegallos dimisión".
Estes actos vandálicos foron realizados no edificio do Concello, catalogado por Patrimonio, así como en xardineiras de granito situadas na Praza de Bugallal.
Segundo indicou o propio Concello nun comunicado, todas as pintadas corresponden, aparentemente, á mesma autoría.
Colaboración cidadá
O goberno municipal do BNG-PSdeG pediu colaboración cidadá para identificar a persoa ou persoas responsábeis dos danos e lembrou que "este tipo de accións supoñen, ademais dunha deterioración de bens públicos, un gasto para a súa limpeza que acaban pagando todos os veciños cos seus impostos".
Os responsábeis públicos indicaron que todas as críticas "son lexítimas", pero que a liberdade de expresión "non ampara actos de vandalismo nin danos nos bens públicos".
