O temporal de terra e de mar, con intensa chuvia e fortes ventos, non impediu a concentración de arredor de 150 persoas no miradoiro de Paxareiras, en Carnota, para protestar "contra o modelo eólico que se está a implantar no país", segundo sinalaron os portavoces dos colectivos da Costa da Morte e Xallas convocantes da mobilización.
Nin o temporal de terra con tanta chuvia,fortes ventos de 40kms/h.nin o gran temporal de mar nin tanta néboa,(non se vía nada no Miradoiro e tan pouco na estrada a Muros) impediu a centos de valentes asistir en pleno temporal a defender o RURAL.
— B. Louro Lago (@lago_louro) October 2, 2021
Emocionante!#NON MÁIS EÓLICOS! pic.twitter.com/3X1MZiOUdQ
Unha vintena de plataformas veciñais de concellos afectados pola instalación de novos parques eólicos, como A Baña, A Capela, Carballo, Laxe, Negreira, Ordes, Santa Comba, Tordoia ou Zas. Tamén de Outes e Mazaricos, os que acumulan un maior número de novos aeroxeradores, próximos a áreas protexidas e núcleos de poboación, nalgúns casos englobando aldeas enteiras.
Tal e como sinalan desde Ecoloxistas en Acción, nestas bisbarras estase a tramitar unha "cantidade desmesurada" de proxectos eólicos sobre humedais de alto valor ecosistémico "que deberían estar protexidos".
"Dada a cantidade de proxectos e liñas de alta tensión asociadas, de ser aprobados, farían case imposíbel manter a poboación no territorio e a conservación dos postos de traballo directos e indirectos de sectores estratéxicos como o agrogandeiro", sinalan desde a organizaciónecoloxista.
Os colectivos convocantes da protesta en Paxareiras mantiveron hai uns días unha xuntanza con parte dos alcaldes dos concellos afectados. Compartiron a súa preocupación ante unha lexislación que permite instalar aeroxeneradores a 200 metros das vivendas.
Consideran que os proxectos carecen dunha avaliación estratéxica e son as propias empresas quen fan os estudios ambientais sen contar cos necesarios informes hidrolóxicos e hidroxeolóxicos.