Un barco pesqueiro galego, o 'Cabo de Hornos Dos', fai fronte a un expediente sancionador que lle pode supoñer unha multa de até 120.000 euros. O motivo? Ter izada no buque unha bandeira galega de tamaño non inferior á española. Así o recolle esta cuarta feira o xornal 'La Opinión de A Coruña'.
O parte aberto pola Capitanía Marítima de Santander, pois a denuncia iniciouse cando estaba atracado en Santoña, sinala que o buque galego puido incumprir até catro puntos no que atinxe ás bandeiras nun barco, segundo di o mencionado xornal. A lei establece que todas as embarcacións deben levar como única enseña a española e que esta ten que estar ubicada nun lugar ben preferente na popa.
Ademais, a lei di que ningunha outra bandeira podería izarse se non o está a española e que esa 'outra bandeira' nunca poderá ser de dimensións superiores á española.
Non é un caso illado
Cómpre lembrar que en xullo de 2013 Sermos Galiza facíase eco das queixas e malestar entre mariñeiros da Ría de Arousa polas multas impostas pola Garda Civil por non levar a bandeira española nas pequenas embarcacións de pesca artesanal.