A balsa mineira de Bama volveu desbordar, como acontece cada vez que chove de maneira abundante, e volveu verter cara ao río Brandelos, afluente do Ulla. Denúnciao a Plataforma Mina Touro O Pino Non, que nos últimos meses puxo en coñecemento de Augas de Galiza e dos medios de comunicacións situacións como a acontecida o pasado sábado, 15 de decembro.
A entidade asegura que Augas de Galiza multou, cando menos dúas veces, a concesionaria Explotaciones Gallegas, con sancións de 30.000 euros e 20.000 euros, polos mesmos feitos. Porén, “a situación segue a repetirse, pois nin a empresa nin a Administración tomaron ningún tipo de medida que evite ou minimice novas verteduras de lixiviados contaminantes desde a antiga mina de Touro”.
Premios baixo sospeita
“O que si se repiten, inexplicabelmente, son os premios a TEN S.L., a empresa encargada da suposta rexeneración dos terreos da mina, en certames nos que participan como membros do xurado, curiosamente, organismos da Xunta”, advirte a plataforma, que asegura que continuará denunciando o desbordamento da balsa “até que se reverta a situación”. Os colectivos que fan parte da rede poñen de manifesto que a Xunta “en ningún caso pode dar luz verde ao novo proxecto mineiro de cobre a ceo aberto, que só viría a rematar de contaminar os nosos ríos e terras”.