Os positivos por coronavirus detectados en 24 horas na Galiza volveron caer en case un cento, até se situar nos 238 novos positivos notificados esta segunda feira, a cifra máis baixa desde o pasado 14 de outubro, cando se rexistraron 247.
Así consta na web da Consellería de Sanidade, con datos actualizados ás 18:00 horas deste domingo, que reflicten que todas as áreas sanitarias descenderon nas infeccións detectadas agás a de Ferrol, con 27 casos novos, unha decena máis; e Ourense-Verín-O Barco de Valdeorras, con 13 -un máis-.
A taxa de positividade está en 4,8%. Isto significa que Galiza está levemente por baixo do limiar do 5% que marca a OMS
A área sanitaria da Coruña-Cee figura como a que ten máis novos contaxios da pandemia esta segunda feira, con 62, un menos que hai un día. A de Pontevedra-O Salnés é a segunda, con 54 novos positivos, tamén un menos.
Pola súa banda, a área sanitaria de Vigo caeu desde o máis de centenar de infeccións até tan só 35 novas (-74), mentres tamén baixaron en Lugo-A Mariña-Monforte, con 24 contaxios (-6); e Santiago-Barbanza, con 23 (-19).
A web de Sanidade tamén reflicte que até o momento realizáronse un total de 900.062 PCR. Isto significa que nas últimas 24 horas leváronse a cabo un total de 5.470 probas, outro descenso, esta vez dunhas 1.500, con respecto á xornada anterior.
Así mesmo, a taxa de positividade volveu a baixar unhas décimas con respecto á notificada o domingo e está en 4,8%. Isto significa que Galiza está levemente por baixo do limiar do 5% que marca a Organización Mundial da Saúde (OMS) para dar por controlada a pandemia.
Continúa subindo igualmente a cifra de mortos que deixa a crise sanitaria, que ascende a 1.205 tras as 12 novas vítimas notificadas este domingo
Por baixo desta porcentaxe de positivos están até catro áreas sanitarias: Ourense (2,2%), Vigo (2,3%), Lugo (3,5%) e Santiago (4%). Con todo, aínda están por riba do limiar da OMS as da Coruña (9,7%), Pontevedra (9,7%) e Ferrol (6,5%).
En canto aos casos activos -persoas que aínda están diagnosticadas da enfermidade-, seguen coa súa tendencia descendente, con 98 menos, até os 7.806 pacientes Covid en toda a Galiza.
Aumentan a 484 os pacientes con Covid hospitalizados na Galiza, aínda que baixan a 78 os que están en UCI. A área de Ourense é a única na que descenden os ingresados tanto en coidados críticos como en planta
No entanto, continúa subindo igualmente a cifra de mortos que deixa a crise sanitaria, que ascende a 1.205 tras as 12 novas vítimas notificadas este domingo -tres delas eran usuarias de residencias de maiores-.
