Auxe, problemas e trampas dos seguros sanitarios privados

Até agora os seguros privados complementarios eran utilizados polos sectores económicos mellor situados que podían pagar sen moito esforzo as pólizas e que ademais obtiñan rebaixas fiscais polos mesmos. Agora as dificultades de acceso á Atención Primaria e as listas de espera hospitalarias favorecen que a poboación con menos recursos recorra tamén aos seguros privados. Esta situación está sendo utilizada polas aseguradoras para facer un gran negocio. En Galicia o 16% de poboación ten un seguro sanitario. — Varios estudos detectaron un incremento da mortalidade evitábel ligada á entrada de intereses privados nos sistemas públicos de saúde O crecemento da aseguranza comezou a partir de 2008 como consecuencia dos recortes para facer fronte á crise. Até este ano abeiraba o 4% anual, pero en 2022 experimentou unha subida do 7%. Causas do crecemento —Os recortes de 2008 e as estratexias para facer fronte á Covid reducindo actividade e poñendo barreiras de acceso ao sistema incrementaron as listas de espera hospitalaria e colapsaron a Atención Primaria, que segue sen recuperarse por falta de investimento, persoal e modernización. —O bombardeo de informacións sobre os problemas da sanidade pública que desprestixian o sistema público. —A presión dos bancos, fondos de investimento e multinacionais, donas das aseguradoras, para entrar no sistema sanitario Estratexias para crecer —Buscar novos tipos de clientes: até o de agora os seguros contratábanos persoas de mediana idade e maior nivel de renda. Tras a Covid aumentou o interese dos menores de 25 anos e mileuristas por asegurase. —Ofertar seguros de baixo custo: pólizas de 8, 12 ou 19 euros. —Incrementar as modalidades de seguros (copagos, variabilidade de cobertura e probas, etc). —Recorrer ao dumping sanitario: as compañías están dispostas a perder diñeiro a curto prazo para captar clientes (reducen o prezo das pólizas, ofertan seis meses gratis, seguros para empresas de 18 euros por empregado, etc). Unha vez captada a clientela aumentan o prezo. —Seguros dixitais de baixo prezo (28 euros ao mes): consultas co persoal facultativo polo móbil ou a probas diagnósticas e métodos terapéuticos simples. —Substituír nas consultas o persoal médico polo de enfermería. Problemas e trampas —Os seguros máis abundantes (entre 20 e 30 euros) inclúen copagos, cadros de especialistas limitados, catálogos de servizos reducidos ou exclusións de determinadas intervencións cirúrxicas. —As pólizas por baixo dos 20 euros son economicamente insostibles, polo que fan trampa (letra pequena): limitan as hospitalizacións, inclúen copagos, incrementan as pólizas en caso de enfermidades crónicas ou recorrentes, cadros de persoal reducidos, cambios inesperados de cobertura, períodos de carencia, exclusións de determinadas enfermidades, restricións de tratamentos novos ou non autorización de tratamentos cubertos pola póliza. A viabilidade mínima dun seguro é de 50 euros ao mes. —Exclusión ou limitacións a maiores de 65 anos ou con enfermidades crónicas. —Reducen custos explotando os seus profesionais —Impoñen unhas condicións laborais que teñen máis que ver con traballos non cualificados que con persoal sanitario especializado. —Obrigan a apertar as axendas para meter máis pacientes. —Impoñen o traballo arreo, algo incompatible coa calidade. —Limitan a capacidade do seu persoal para pedir probas ou poñer determinados tratamentos. —Pagan salarios moi baixos: entre 7 e 30 euros por consulta de medicina xeral e entre 16 e 40 para especializada, o que supón entre o 5 e o 10% das ganancias. Comezan a colapsar —A saturación da AP e dos hospitais públicos empeza a trasladarse aos centros privados, polo colapso da pública e o auxe dos seguros de baixo custo. —Comeza a haber as listas de espera nas urxencias (3-5 días ou máis); en cardioloxía, dermatoloxía e pneumoloxía (3-4 meses) ou nalgunhas probas. —As aseguradoras pretenden ocultar esta realidade dado que desde o ano 2019 non se publicaron datos sobre os tempos de espera na privada. Consecuencias para a saúde —Investigacións en Reino Unido e Italia detectaron un incremento da mortalidade evitable ligada á penetración de intereses privados nos sistemas públicos —As aseguradoras acaparan os servizos máis rendibles e os pacientes con menor risco, remitindo os tratamentos máis custosos ao sistema público.