Unha muller foi asasinada cunha arma de fogo na localidade de Oia, no Baixo Miño. Os feitos producíronse á primeira hora da tarde deste sábado nas inmediacións do cámping O Muíño, situado na parroquia de Mougás, ao pé da estrada que une Baiona e A Guarda.
Fontes confirmaron que o presunto autor xa está identificado, mais polo momento non foi detido. As primeiras hipóteses apuntan a que se trata dun caso de violencia de xénero, segundo trasladaron as mesmas fontes, que ademais afirmaron que a muller recibiu varios disparos.
O 112 tivo coñecemento dun altercado neste punto sobre as 16.10 horas deste sábado. Nese momento, a central de emerxencias mobilizou até o lugar á Garda Civil e á Policía Autonómica.
De confirmarse que se trata dun caso de violencia de xénero, sería o segundo crime machista ocorrido en Galicia este 2023 tras o asasinato dunha muller en Baiona o pasado mes de febreiro polo que foi detida a súa ex parella.
Uns surfeiros rescatan o corpo sen vida dun home que apareceu flotando nunha praia de Oleiros
Un grupo de surfeiros rescatou da auga o corpo sen vida dun home que apareceu flotando na praia de Bastiagueiro, no municipio de Oleiros.
Segundo trasladaron fontes dos servizos de emerxencia, o cadáver corresponde ao dun veciño de Lugo de 75 anos que foi localizado polos deportistas no mediodía deste sábado.
Os surfeiros sacaron da auga o corpo e levárono á beira, onde os servizos sanitarios desprazados ao areal por Urxencias Sanitarias 061 confirmaron o seu falecemento.
Até o lugar mobilizáronse membros da Policía Xudicial, así como axentes da Policía Local e do servizo de emerxencias de Oleiros.
Localizan na lagoa de Cospeito o cadáver dunha muller desaparecida
Equipos de emerxencia localizaron á primeira hora da mañá deste sábado na lagoa de Cospeito, na comarca da Terra Chá, o cadáver dunha muller que se atopaba en paradoiro descoñecido desde a xornada anterior.
Tras ser avistado, o corpo foi recuperado da auga polos bombeiros de Vilalba nas primeiras horas deste sábado, segundo trasladaron os servizos de emerxencia.
O caso está a ser investigado pola Garda Civil, que tivo constancia da desaparición desta muller na noite da sexta feira.
Tras o exame da persoa falecida, fontes próximas á investigación apuntan que o corpo non presenta signos externos de violencia.
O operativo coordinado pola Garda Civil para recuperar o corpo contou coa participación de membros do servizo municipal Protección Civil de Vilalba e de voluntarios de Protección Civil de Meira.
