As rúas das principais cidades e vilas de Galiza recibirán a campaña electoral que encetará pasada a media noite de hoxe, con manifestacións. As mobilizacións convocadas pola CIG teñen por obxecto contestar os Orzamentos Xerais do Estado e as reformas que os seguirán nos videiros meses. e enviar unha mensaxe clara de oposición ás políticas de recortes desenvolvidas polo Partido Popular desde Madrid e a Xunta, e na que previsibelmente insistirá Feijóo no caso de resultar re-elixido o vindeiro 21-O.
O firme apoio de Feijóo ás contas aprobadas polo executivo central, que o colocou como o principal valedor autonómico dos orzamentos que afondan nos retallamentos de servizos públicos e que restan a Galiza 400 millóns de euros, poría en evidencia segundo a CIG cal será a folla de ruta do PP de continuar á fronte do goberno galego.
A central sindical nacionalista desenvolveu durante as últimas semanas unha intesa campaña de denuncia do balance do goberno Feijóo e na que fixeron un chamado explícito a "parar as súas políticas antisociais" nas urnas o próximo día 21. Asemade, a CIG quere reivindicar con esta convocatoria "competencias reais" para Galiza en materia económica, para poder desenvolver as políticas necesarias cara unha saída social da crise.
O secretario xeral da CIG, Suso Seixo, que participará na manifestación de Vigo, amósase partidario mesmo de abordar o debate arredor da saída do euro. “Non podemos afrontar unha crise económica nas circunstancias actuais, sen un banco central que avale a compra de débeda pública, que poida emitir moeda e sen a capacidade de dotarnos dunha política monetaria, fiscal e económica ao servizo dos intereses da maioría social e non da banca europea”, asegura.
Horarios e emprazamento das concentracións:
- Vigo: 20.00 h desde Vía Norte.
- A Coruña: 20.00 h desde a Praza de Vigo
- Pontevedra: 20.30 h desde a Praza da Ferrería
- Ferrol: 20.30h desde a Avenida de Esteiro
- Compostela: 20.30 h na Praza Roxa
- Lugo: 20.30 h desde Ronda da Muralla, 58
- Ourense: 20.00 h no pavillón dos Remedios
- Vilagarcía: 20.30h na Casa do Mar
- Foz: 20.00 h na Casa do Concello
