Máis de 12.000 estudantes galegos e galegas principiaron esta terza feira as probas da Avaliación do Bacharelato para o Acceso á Universidade (Abau). Esta cuarta foi a quenda, a primeira hora, do exame de Lingua Galega e Literatura, e Nós Diario estivo presente nas aulas.
Na cuarta pregunta desta proba propuxéronse dous exercicios a escoller polo alumnado, un dos cales consistía en explicar a situación que denuncia Marilar Aleixandre a respecto da normalización e transmisión da lingua galega nun artigo de opinión que foi publicado neste xornal o 24 de setembro de 2021.
O texto levaba por título 'Cuñados: orgullo de galegofalantes', e nel a autora abordaba, por unha parte, a comedia galega no cimena a través do filme Cuñados, e, por outra, no extracto recollido no exame da selectividade, o caso dunha rapaza galega, Moraima, á que a asistente de voz de Apple, Siri, non lle recoñecía as súas palabras por empregar o galego:
Galegofalante consciente de que lingua fala, de que é diferente da da máquina. Nun intre de perigo tanto da transmisión do galego, como da preservación polas nenas e nenos que reciben o galego na casa e corren risco de perdelo na escola –na meirande parte dos casos non polas mestras, senón polas outras crianzas–, o de Moraima e Antía é un exemplo a seguir. E mostra por que demandamos asistentes virtuais e produtos informáticos en galego. Porque, sabes Siri? Eu falo galego e quero seguir falándoo.
Marilar Aleixandre. Nós Diario. 24 de setembro de 2021.
Outros contidos da selectividade
A industrialización e o impacto da chegada do ferrocarril, a Restauración borbónica e a Transición tras o fin da ditadura de Francisco Franco centraron o exame de Historia de España, que inaugurou esta terza feira as probas da Abau na Galiza.
Calendario de exames
Esta cuarta feira é o día con maior cantidade de probas. Após Lingua Galega e Literatura chegan Primeira Lingua Estranxeira (11), Matemáticas e Latín (13), Debuxo Técnico, Artes Escénicas e Segunda Lingua Estranxeira (16) e as probas de Química e Grego darán por finalizada a segunda xornada ás 18 horas. Cada estudante examinarase dun máximo de cinco materias esta xornada.
A convocatoria ordinaria rematará na quinta feira con Bioloxía e Historia da arte (9 horas), Física, Xeografía e Cultura Audiovisual (11) e as últimas probas corresponden ás materias de Xeoloxía e Historia da Filosofía, ás 13 horas.