Un aeroxerador comezou a arder contra as 10.28 horas desta terza feira no parque eólico Viveiro, operado por Iberdrola e situado neste mesmo municipio, no monte de Penedo do Galo, segundo recolleu no seu mapa de incidencias o 112-Galiza, que informa a esa hora dun incendio industrial no lugar do que tamén se fixeron eco as redes sociais.
Eólico en llamas. Viveiro (Lugo). pic.twitter.com/zXGVAkOusM
— Pere (@pere_jpereirale) January 24, 2023
Fontes do 112 consultadas por Nós Diario informan de que foron varios particulares quen alertaron por teléfono do lume, visíbel desde diferentes puntos do municipio. Até o lugar desprazáronse por prevención efectivos sanitarios e de emerxencias e deuse aviso aos bombeiros, a Garda Civil, a Policía Local e Nacional, o Concello de Viveiro, Protección Civil e as autoridades de Medio Ambiente da Xunta.
O incendio iniciouse nunha das pezas do muíño, que caeu ao chan e estendeu, levemente, as chamas por unha superficie "de escasas dimensións" da masa forestal que os bombeiros dan practicamente por controlada.
Contra as 13.30 horas deuse por extinguido o fogo após calcinar unha superficie dunhas 0,1 hectáreas de monte raso. A turbina eólica ardeu por completo.