A malpicá Nieves Vilar vén de ser premiada co galardón “Rosalía” polo seu activismo a favor da inclusión do alumnado con enfermidades de longa duración e que, por razóns de saúde, non pode estudar nos centros de ensino ordinarios. O premio, concedido polas ANPA da Costa da Morte, recoñece o labor da nai de Hadrián, o rapaz con leucemia ao que a Xunta de Galiza lle negou a educación a domicilio.
Nieves Vilar afirma nun comunicado que a situación actual da atención educativa está caracterizada pola “desorganización” e polo “abandono”, ao non atender a obriga de darlles cobertura aos dereitos dos escolares enfermos. “Debe aprobarse unha normativa educativa cunha atribución de horas mínimas que despois se modularán en función das posibilidades físicas da enfermidade”, explica.
Ademais, as ANPA da Costa da Morte outorgáronlle o premio “Werto” contrario ao ensino público ao conselleiro de Educación, Román Rodríguez, por “negar o problema e condenar á desatención educativa todos os nenos e nenas galegas enfermas”. Tamén censuran as ANPA que o responsábel de Educación se negara a recibir Nieves Vilar.