Fai un ano da explosión da pirotecnia ilegal na parroquia de Paramos, en Tui, que acabou coa vida de dúas persoas e deixou 37 feridas e numerosas desfeitas en vivendas e leiras. Centos de veciñas e veciños congregáronse esta tarde para homenaxear as persoas falecidas e feridas nun acto amenizado coa interpretación de varias pezas musicais e que arrincou á mesma hora en que hai un ano se producira a explosión, ás 16.23 horas.
O presidente da Asociación de Afectados Paramos- Guillarei, Salvador García, leu un manifesto no que lembrou o horror vivido pola veciñanza naquel 23 de maio de 2018. García puxo en valor a creación desta plataforma e as manifestacións e reunións levadas a cabo coas administracións reivindicando os seus xustos dereitos após as perdas persoais e materiais.
En nome das persoas afectadas, García agradeceu o apoio e solidariedade recibidas desde o día da explosión
En nome das persoas afectadas, García agradeceu o apoio e solidariedade recibidas desde o día da explosión, xa que permitiu o inicio da reconstrución da zona; e anunciou que a plataforma permanecerá unida en loita co obxectivo de que Paramos rexurda.
O vicepresidente da Comunidade Islámica de Tui, Nouredin, leu o mesmo manifesto en árabe, a lingua materna da parella falecida.
Ao remate do acto, colocouse unha coroa de flores no lugar da explosión e plantouse un carballo como recordo da traxedia, das vítimas e da solidariedade recibida.
Desde a Asociación de Afectados de Paramos-Guillarei anunciouse que recorrerán a resolución xudicial
O propietario da pirotecnia La Gallega, Francisco G. L., é a única persoa investigada polos feitos como suposto responsábel do galpón onde se produciu a explosión. Após o descubrimento de 1.800 quilos de material explosivo noutros dous almacéns ilegais da súa propiedade decretouse prisión sen fianza.
O pasado mes de marzo, o Xulgado de Instrución número 1 de Tui acordou a posta en liberdade provisoria de Francisco G. L. ao asegurar que non se reunían "os presupostos legais" para mantelo en prisión. Mentres, desde a Asociación de Afectados de Paramos-Guillarei anunciouse que recorrerán a resolución xudicial.