As alumnas do Mestrado de Xénero e Igualdade declaran ante o reitorado da USC

Catro estudantes da Universidade de Santiago de Compostela foron chamadas a declarar esta mañá para esclarecer o acontecido durante as súas reivindicacións contra o profesor Luciano Méndez Naya, a quen culpan de ser machista e promover un discurso de odio nas súas aulas.

O grupo chamado a declarar esta mañá no reitorado, formado por tres mulleres e un home, foi preguntado polos sucesos do día 17 de marzo no que varios alumnos se presentaron na aula de Luciano Méndez con pintadas no seu corpo e sen camisola, como resposta á súa actitude nas aulas nas que increpara a unha alumna por levar escote.

As estudantes falan dun expediente informativo mentres o Reitorado di que se trata dun procedemento esclarecedor

As alumnas rexeitaron responder unha por unha ás preguntas que se lles fixo sobre o día da protesta na aula, cinxíndose á lectura dun manifesto conxunto que explicaba a súa versión dos feitos e na que reclamaban o seu dereito a rexeitar as conductas machistas dentro da universidade. As alumnas foron preguntadas, tamén, por unha serie de pintadas que apareceron nas paredes dos centros en apoio á súa causa, coas que negaron ter calquer tipo de vinculación.

Tras a comparecencia fronte ao reitorado, decenas de persoas apoiaron a Kely, Carmen, Belén e Eneko: as catro estudantes ás que se lles recolleu declaración. Á saída da mesma, as alumnas afirmaron que lles fora aberto un expediente informativo, mentres que dende o Reitorado matizan, en conversa con Sermos Galiza, que se está a seguir un procedemento que documente todo o acontecido, para esclarecer os sucesos que lles foron remitidos dende o decanato da facultade na que se imparte o Master. Este proceso non ten relación co expediente disciplinario que lle foi aberto a Luciano Méndez Naya tras os actos sexistas que desencadearon o caso. O expediente do profesor atópase agora mesmo á espera de que sexan determinadas as sancións que a USC estime adecuadas. Polo de agora Méndez segue impartindo clases con normalidade.

Méndez continúa a impartir aulas na Facultade de Económicas

Como parte das reivindicacións ante esta situación, os alumnos formaron o colectivo Teteiros Ceives, a través do cal comezaron unha campaña de recollida de sinaturas para conseguir o cesamento de Luciano Méndez como profesor da USC, "por emitir un discurso de odio nas súas aulas e por impartir uns valores que non se corresponden cos que pregoa a USC". Con esta campaña, ademais, tamén solicitan unha autoinculpación simbólica dos asinantes na que afirman que eles tamén forman parte das protestas.

O colectivo tamén busca atopar a máis alumnas e ex alumnas de Méndez que fosen testemuñas ou vítimas do machismo nas aulas, para nun futuro tramitar unha demanda de carácter xudicial.

Na xornada de mañá, terza feira 3 de maio, serán citadas outras catro alumnas a declarar para continuar o procedemento de recabamento de testemuñas que o reitorado afirma estar a facer dende as últimas dúas semanas, mais non foi aclarado se as alumnas que compareceron hoxe e as que o faran mañá, terán que voltar a declarar.