A Serra do Gêres convértese este domingo na protagonista da última camiñada “Fauna D’Aquí” organizado pola Asociación para a Defensa Ecolóxica de Galiza (ADEGA). Unha andaina que estará guiada por Alberto Gil “Toupa”, colaborador do GREFA (Grupo de Recuperación da Fauna Autóctona e o seu Hábitat).
A protagonista deste percorrido será a fauna que habita os grandes territorios montañosos, tales como a aguia real, o lobo e a cabra montesa por “ser exemplares moi singulares nese territorio”, segundo declaracións do organizador, Fran Rei, a Sermos Galiza.
A ruta, de dificultade media e 12’5 quilómetros, estará dividida en dous itinerarios. Pola maña, as persoas asistentes camiñaran ata o corazón da serra ao foxo do Lobo de Guende, unha trampa para este tipo de cánidos que se constitúe como “un auténtico xacemento histórico medieval”, como explica Rei.
Durante a tarde, cambiarase a dureza da montaña pola tranquilidade do val. A ruta transcorrerá pola garganta do río Caldo a través da Vía Nova, “unha antiga vía romana pola que se entraba a Gallaecia nesa época”, aclara o organizador.
A Serra do Gêres está constituída por unha peculiar xeoloxía, xeomorfoloxía e clima que contribúen á conformación dun hábitat con especies únicas de flora e de fauna, que fan deste territorio o seu último refuxio.
O Parque Natural Baixa Limia - Serra do Gêres, xunto co contiguo Parque Nacional da Peneda - Gerês, conforma unha unidade de 100.000 ha de espazo protexido onde se solapan distintas figuras de protección (Reserva Transfronteiriza da Biosfera, ZEC, ZEPA).
