Adega Bordel e a defensa da 'Branca Lexítima'

No cerne de Adegas Bordel latexa o espírito dos viños ligados á Terra", así a definen na páxina web de Viños IXP (Indicacións Xeográficas Protexidas) da Galiza. Tamén indican que "a posta en valor dunhas terras e unha caste propia do territorio e esquecida co paso do tempo". Podemos dicir sen medo a nos enganar que non lle falta razón. A actividade principal da adega está ligada a diferentes actividades agrarias, mais na viticultura ten a súa máxima expresión, destacando a defensa dunha uva con presenza secular neste territorio, a Branca Lexítima. Xosé Antonio Meixide foi profesor no Centro de Formación e Experimentación Agroforestal de Guísamo (C.F.E.A.) e membro da adega Bordel. Nós Diario abordou con el diferentes cuestións sobre a adega, a defensa da Branca Lexítima ou a maneira de traballar as viñas. —Como comezou a adega Bordel? A nosa adega comezou en Bordel, un lugar da parroquia de Sarandós en Abegondo, de aí o nome. Comecei a traballar hai tempo no mundo da viticultura e na produción de viños mais non somos viticultores exclusivos, simplemente vivimos no rural e temos as leiras dedicadas a aquilo ao que se dedicaron historicamente. A finca onde temos as viñas xa se dedicaba desde hai moito tempo á actividade vitivinícola. Na miña casa sempre houbo tradición de viño e, aos poucos, decidín comezar a producir unha pouca uva que inicialmente vendía e máis adiante pareceume oportuno dar comezo ao noso proxecto propio por varios motivos. Entre outros, queriamos achegar o noso gran de area ao sector vitivinícola da IXP de Betanzos que estaba indo a menos despois de moitos anos de tradición. Temos a intención de implementar ao longo deste ano outra media hectárea de terreo pra cultivar uva. Sabemos que é pouco terreo mais traballar a nosa viña en concreto supón unha gran dificultade pola orografía do lugar, ademais non é unha adega herdada nin eu son un empresario cun grande orzamento. O que quixemos foi aproveitar as terras para vivir no mundo rural da maneira que nos parecía máis correcta. —Por que é tan importante defender a uva Branca Lexítima? A Branca Lexítima é a uva propia de Betanzos, aínda que o cambio climático as cousas están a mudar. Mais en condicións normais, Betanzos é unha zona límite para as castes autóctonas por humidade e temperatura. Con todo, a Branca Lexítima é unha caste moi adaptada a facer ciclo curto, é bastante resistente ás condicións da zona e dáse nun acio coas uvas separadas. Esta uva é máis resistente a certas enfermidades e, por outra parte, ao ter o ciclo máis curto, tamén é máis fácil que alcance unha gradación alcólica correcta. Ademais de todos estes valores, é unha caste que se comporta moi ben tamén en termos de sabor; é intensa e ten un aroma moi agradábel. Podemos dicir que é unha caste que permite producir viños de calidade e únicos. Tamén é certo que a Branca Lexítima non está só en Betanzos, tamén se dá no Morrazo, Padrón, Boiro e até na Ribeira Sacra. De todos os modos os tres lugares onde está máis presente este tipo de uva son a Barbanza, Betanzos e Negueira de Muñiz. —Como traballan as viñas? Como temos moi pouca superficie de viña, traballamos todo de maneira moi artesanal. Digamos que apostamos por un modelo de traballar as viñas sustentábel. É unha forma de traballar que é moi laboriosa mais que dá resultados moi satisfactorios. A pesar de que esta zona estaba de caída en canto á produción de viño, nós seguimos apostando por facer viño aquí e continuar a tradición que sempre houbo de produción. Tamén dá moitos folgos saber que os viños que producimos son ben acollidos e que hai moita xente que gusta deles. Mesmo en concursos moitas veces conseguimos premios a pesar da pouca cantidade que producimos. —Que características teñen os viños que producen? Os viños que producimos varían dependendo das diferentes condicións que se dean cada ano. Con todo, unha característica moi boa dos nosos viños é o grao de acidez que conseguimos e que consideramos moi axeitado así como a calidade da uva. O modelo que seguimos é dunha viticultura non curtopracista, normalmente podemos traballar con viños a mesmo máis de catro anos. Ademais, a Branca Lexítima ten unha característica moi curiosa e é que, co tempo, vai corrixindo a acidez do viño, o cal dá uns resultados realmente únicos. Os nosos son viños moi agradábeis e moi expresivos en sabor, é dicir, viños que nunca están apagados e iso dálles un valor importante que cremos que os consumidores poden apreciar e valorizar tamén. É o resultado da nosa filosofía á hora de tratar o viño.