O condutor dun autobús escolar no que viaxaban esta sexta feira 43 menores dun centro educativo de Celanova resultou ferido após producirse unha colisión múltiple, contra as 19.30 horas, na A-52 ao seu paso polo municipio das Neves. Alén do bus, no sinistro víronse implicados un camión e unha furgoneta.
Segundo informou o 112 Galiza, varias persoas particulares contactaron co número único de emerxencias para alertar dunha colisión por alcance neste punto.
O Centro Integrado de Atención ás Emerxencias da Galiza comunicou que ningún escolar precisou ser evacuado ao hospital, aínda que algúns recibiron asistencia no mesmo lugar do accidente por lesións "de escasa importancia".
Pola súa parte, o condutor do autocar quedou atrapado no interior e foi necesaria a intervención dos equipos de rescate para a súa liberación.
Unha vez fóra do vehículo, foi asistido polos profesionais de Urxencias Sanitarias da Galiza-061.
Cortes na circulación
A consecuencia do impacto, a circulación viuse afectada nos carrís central e dereito da A-52 en sentido Benavente, á altura do quilómetro 281.
Neste operativo interviñeron, alén dos profesionais sanitarios, os Bombeiros do Baixo Miño, os membros do GES-SPEIS de Ponteareas, os axentes da Garda Civil de Tráfico e o persoal de limpeza e mantemento do Ministerio de Fomento.