Os sindicatos con representación no ensino concertado en Galiza retomaron esta cuarta feira os protestos para denunciar que os 7.000 traballadores e traballadoras deste sector levan 8 anos a perderen salario e dereitos.
Desde a reunión co conselleiro do pasado día 5 de decembro non houbo resposta algunha por parte da administración ás demandas presentadas daquela, informan desde a CIG, unha das centrais representativas canda FSIE, UGT, CCOO Ensino, FEUSO.
Liberados e liberadas sindicais concentráronse diante da Consellería e, por rexistro, solicitaron a convocatoria da Comisión Tripartita do Ensino Privado Concertado (CTEPC). Aliás, hai en marcha unha campaña de recollida de sinaturas co lema “Negociación na concertada, xa!”, firmas que serán entregadas o vindeiro día 25 de abril, data na que se realizará unha concentración de delegadas e delegados da concertada diante da Consellería. De non haber avanzos, os sindicatos non desbotan accións “máis contundentes”
O Acordo de Mantemento de Emprego (AME) é unha das prioridades para os representantes sindicais, sendo que “non temos AME dende o ano 2009, e a perda de unidades suporá un maior paro”. A maiores, recordan os recortes salariais soportados por este colectivo nos últimos anos, consolidados en nómina e que aínda non se recuperaron, ben como a paga extraordinaria de antigüidade dos 25 anos, que non se devenga dende 2010, “sendo Galiza a única comunidade autónoma do Estado que non paga a PEA, dereito recoñecido por xurisprudencia reiterada”.
O representante da CIG-Ensino, Henrique García, criticou a actitude "inmobillista e rácana" da Consellaría. Lembrou que nos últimos 8 anos este colectivo perdeu un mínimo de 19.000 euros por persoa en conceito de salarios, o que leva a que estea a 93% de equiparación salarial cos empregados e empregadas da pública.
