O 22,8% das prazas hospitalarias do sistema sanitario galego son privadas

O gasto sanitario privado per cápita sitúase na Galiza en 567 euros. A este respecto, o informe da Fundación Idis de 2022, con datos referidos a 2020, apunta que os centros de saúde de titularidade privada xa suman o 28% do gasto sanitario total no país. A Fundación Instituto para o Desenvolvemento e Integración da Sanidade (Idis) é unha entidade constituída en maio de 2010 que aglutina o sector sanitario privado, contando no seu Padroado con 12 representantes dos principais grupos de hospitais e clínicas privadas, así como de compañías aseguradoras. A Xunta da Galiza eliminou 763 camas nos hospitais galegos desde o ano 2009 O informe impulsado pola patronal da sanidade privada recolle que a porcentaxe do gasto sanitario privado galego sobre o total do sistema só é superado por Madrid, Catalunya, Nafarroa, Euskadi e País Valencià. Neste contexto, Catalunya, con 45% sobre o gasto sanitario total, e Madrid, con 40%, lideran esta listaxe. No que atinxe á Galiza, o relatorio recolle que o Goberno galego destinou á sanidade privada, en 2022, 219 millóns de euros, o que representa 4,5% do total do orzamento sanitario para ese exercicio. A contía implica un incremento de practicamente 14 millóns de euros en relación a 2020, cando alcanzou 205 millóns e en 2,8 millóns de euros a respecto de 2021. A partida máis elevada deste capítulo é a destinada a concertos con institucións da Atención Especializada, que suma o 62,9% do total. Ao tempo, os concertos para programas especiais de hemodiálise significan o 11,2%, os concertos con centros de servizos de diagnóstico, tratamentos e terapias o 7,4%, os concertos para o programa especial de transporte o 14,1% e outros servizos de asistencia sanitaria o 4,5%. SOS Sanidade mobilizarase para exixir a aprobación da ILP pola Primaria A porcentaxe de orzamento público que o Goberno galego destina a concertos coa sanidade privada colócase na media do Estado. Nesta liña, a contía é moi inferior a territorios como Catalunya, con 24,4% do presuposto, Illes Balears, con 9,2%, ou Madrid, con 9%, mais é superior á de comunidades como Castela e León, con 2,7%, Cantabria, con 2,1%, ou País Valencià, co 3,8% do orzamento. 55,8% dos hospitais galegos son privados O peso da sanidade privada é moi relevante no ámbito da Atención Especializada. Segundo as cifras procedentes do informe da Fundación Idis, Galiza conta con 15 hospitais de titularidade pública e 19 de propiedade privada. Ao tempo, nove destes centros sanitarios teñen asinado un concerto parcial co Servizo galego de Saúde (Sergas), dous un concerto substitutorio e un fai parte da Rede de Hospitais de Utilización Pública (RUHP). A Galiza conta con 2.226 camas hospitalarias de xestión privada. As mesmas representan o 22,8% do total do sistema sanitario galego e o 4,5% das prazas privadas existentes no conxunto do Estado. A este respecto, só presenta unha porcentaxe máis elevada de camas hospitalarias neste réxime de titularidade Catalunya, con 39,2%, Madrid, con 13,6%, Andalucía, con 10,9%, e País Valenciá, con 4,7%. A maior concentración de camas do sector privado dáse nos 14 hospitais de atención xeral, con 1.872. A maiores, os tres centros especializados en saúde mental e no tratamento das toxicomanías suman 228 e outras dúas dotacións sanitarias privadas engaden 166. 1.526 médicas marcharon da Galiza desde 2010 para traballar fóra do Estado español A Xunta da Galiza ten concertadas un total de 1.654 prazas hospitalarias cos operadores sanitarios privados. Neste sentido, o 74,3% das camas dos hospitais privados do país están financiadas pola Administración galega, rexistrando unhas cifras superiores Madrid, con 81,2%, Andalucía, con 77,8%, e Catalunya, con 77,4%. Os propietarios da sanidade privada galega O negocio da sanidade privada na Galiza está en mans das grandes multinacionais do sector. Así, o primeiro operador en número de prazas é o grupo Ribera Salud, propiedade do conglomerado estadounidense Centene, e titular de catro centros médicos no país, entre eles o hospital vigués de Povisa, con 573 camas, o hospital ferrolán Juan Cardona, con 150 camas, e o hospital lugués de Polusa, con 80 camas. O grupo Quirón, pertencente ao xigante alemán da saúde Fresenius Helios, dispón na Galiza de oito centros médicos. O máis grande en número de prazas é o hospital Miguel Domínguez de Pontevedra, con 98, seguido do Sanatorio Nosa Señora dos Ollos Grandes de Lugo, con 70 ,e do hospital Quirón da Coruña, con 54 prazas. HM e Vithas Por outra parte, Hospitales de Madrid (HM), propiedade da familia Abarca Cidón, conta con catro centros sanitarios na Galiza. Así, na Coruña, son titulares do hospital Maternidade Belén e da clínica Modelo, con 146 camas operativas. Ao tempo, en Santiago de Compostela posúen os hospitais Nosa Señora da Esperanza e A Rosaleda, con capacidade para 119 doentes. A poboación galega é a que menos confía na sanidade privada: un 16,6% asinou un seguro Vithas é outro dos xigantes do sector presente na Galiza. A compañía, propiedade da familia Gallardo, donos da farmacéutica Almirall, é titular da clínica Nosa Señora de Fátima de Vigo, con 200 prazas. Este grupo empresarial, canda Ribera Salud, Quirón e Hospitales de Madrid, debe parte do seu desenvolvemento aos procesos de privatización da sanidade pública impulsados na comunidade de Madrid e en Valencia, baixo gobernos do Partido Popular. Galiza, á cola de todo o Estado en seguros sanitarios privados O 16,6% da poboación galega conta cun seguro sanitario privado. Segundo os datos achegados pola Consellaría de Sanidade para 2022, é a cifra máis baixa de todo o Estado, colocándose a media galega oito puntos por baixo da media estatal. Neste sentido, a porcentaxe de persoas con seguro sanitario privado incrementouse en 2,2% desde 2016, pasando de 382.650 aseguradas e asegurados nesa anualidade a 426.997 en 2021. A este respecto, a patronal da sanidade privada sinala que Madrid, con 39%, e Catalunya, con 35%, son os territorios do Estado con máis persoas con seguro sanitario privado. O 76,5% das galegas e dos galegos prefiren o sistema público de saúde fronte ao privado. O novo modelo de incompatibilidades dos médicos favorece a privatización Segundo as cifras achegadas polo Barómetro Sanitario, a porcentaxe da cidadanía galega que opta pola sanidade pública supera en 8,6 puntos a media estatal. Así, a Galiza é a comunidade do Estado onde máis persoas elixen a sanidade pública. A continuación, sitúase Euskadi, cunha porcentaxe de 75,8%; e Castela e León, con 75,6%. Nun sentido contrario, a poboación das Illes Balears e de Canarias é a que máis aposta pola sanidade privada. Por outra parte, o 84,2% da poboación galega escolle os hospitais públicos para as súas intervencións en tratamentos, situándose 9 puntos por encima da media estatal. Por riba da cidadanía galega aparece a cántabra, cun 85%, e xusto por baixo Castela e León, cunha porcentaxe de 84%. Pola contra, Balears e Catalunya lideran na Atención Especializada a preferencia pola sanidade privada.