#sermos220: a Galiza minguante

Falamos do alarmante devalo demográfico, entrevistamos Xurxo Souto, debullamos por que miles de empresas de todo o Estado se fugan a Madrid e adentrámonos na flora e fauna 'exótica invasora' que hai en Galiza. Todo isto, e moito máis, xa na nosa loxa.

A última proxección demográfica do INE sinala que Galiza perderá perto do 10% da súa poboación actual dentro de quince anos e que non haberá un saldo vexetativo tan negativo en todo o Estado. O país esmorece e a reacción política non vai máis alá de medidas cosméticas. Falamos disto na reportaxe 'Un país que esmorece', que tamén nos dá pé a preguntarnos sobre a efectividades das políticas de natalidade.

SG220

'As invasoras que toman Galiza'. Segundo dados da Xunta de Galiza, existen un total de 192 especies exóticas invasoras no país. A meirande parte, o 60 por certo, correspóndese con plantas. Explicamos cales son e as ameazas que implican. Un dato, “o impacto potencial económico da erradicación chega aos 12.700 millóns de euros ao ano (uns 24.000 euros por minuto)”.

O Goberno de Feijóo agasalla as familias que teñen un bebé cunha cesta con produtos para o coidado das crianzas, mais esquece o seu deber de fomentar o idioma propio do país no ámbito familiar. De feito, a cesta inclúe un CD con arrolos en castelán. 'Cestas, bebés e exclusión do galego'.

Pasaron 25 anos desde que o Parlamento de Galiza aprobase a autovía entre A Coruña e Carballo, “sempre sen peaxe”. O PP incumpre as súas promesas, a cidadanía mobilízase a través de distintas plataformas e o alcalde de Arteixo négase a asumir a responsabilidade do PP polo mantemento desta peaxe. 'Cando o PP defendía a gratuidade da autoestrada AG55'.

Rajoy presidente e Plan Retorna

'Rajoy consegue todos os seus obxectivos ao desarmar o PSOE'. Rajoy podería ter forzado unhas terceiras eleccións e probabelmente tería obtido máis escanos na cámara. Porén, o seu obxectivo real é a división da esquerda e satelizar o PSOE. Ese propósito cumpriuse mellor coa abstención de Ferraz. E falamos con Rocío de Frutos, a deputada ourensá que votou Non á investidura de Rajoy. “Pedro Sánchez ten o meu apoio se decide presentarse”.

A volta a Galiza das persoas emigradas menores de 35 anos, 90 mil desde o ano 2009, prioridade para o BNG. Galiza está a drenar populación cara ao resto do Estado e do planeta a un ritmo brutal. Isto estase a traducir nunha queda demográfica que ameaza a economía e o benestar do país. O BNG propón o Plano Retorna para favorecer a volta a casa. '88 millóns para o Plano Retorna'.

O doutor en Ciencias Sociais, Julio C. Gambina (Bos Aires), debulla o novo escenario internacional, caracterizado pola resistencia das principais potencias capitalistas a renunciaren ao seu rol hexemónico, a disputa de novos actores globais como China e Rusia. Fenómenos que inscribe nun marco de múltiples crises de alcance sistémico. 'Mudanzas na disputa pola hexemonía mundial'.

'Um ano de governo do PS em Portugal'. O primeiro ano do novo governo português supôs frear as políticas de agressão ditadas pela Troika e iniciar uma tímida recuperação de direitos. No entanto, visou também as limitações de uma mudança pilotada em minoria pelo sistémico Partido Socialista.

'Venezuela, entre o diálogo e a fractura definitiva'. Poucos días despois de se cruzaren mutuas acusacións de golpismo, o chavismo e a oposición poñen en marcha un diálogo baixo o abrigo internacional. Ambas as partes concordan en rebaixar a crecente tensión política e social.

Capitalidade e privilexios

Ser capital do Estado garántalle a Madrid unha vía privilexiada de ingresos, o Imposto de Sociedades: empresas e compañías que operan e fan negocios en todo o Estado mais tributan en Madrid. Ministerios e a inmensa maioría de organismos públicos, así como a maioría das firmas de accionariado estranxeiro, teñen sede en Madrid. Con todos eses ingresos pode facer unha política tributaria de baixos impostos que atrae empresas de todo o Estado. Só no primeiro semestre, 3.738. 'Madrid, paraíso fiscal'. En análise, a segunda parte de 'Galiza, a perspectiva internacional'.

“O mar non é pasado, o mar é futuro”.

Entrevistamos Xurxo Souto. 'Contos do mar de Irlanda' (Xerais, 2014) é o libro en galego máis vendido en 2015, un libro que recupera e transmite a memoria de homes e mulleres do mar, voces anónimas cargadas de historias que aínda están por ser ouvidas. Conversamos co autor e colaborador de Sermos Galiza sobre como xurdiron as cen arribadas, a importancia do mar na Galiza e o seu proxecto literario bravú. “Como non o coñecemos, os terrícolas tendemos a ver o mar como algo folclórico, decimonónico ou como algo soberbio. Cando realmente o motor do mar na Galiza son as grandes cidades, Vigo e A Coruña”.

Non falta a sección Fóra de Serie, nin 'andar e ver' co colectivo Xea a nos levar ao Cuíña, nos Ancares. Nin a contra-capa, a selfie entrevista... e moito máis. Tamén neste número as críticas e achegas de Mario Regueira, Andrés Castro, Marga Doval, David Otero, Xoán Costa..
 

Máis en Só en papel
Só en papel
Máis un número do Sermos Galiza saído do forno. Falamos das persoas sen fogar no noso país, entrevistamos Francisco…
Só en papel
Máis un novo número saído do prelo. Falamos das perto de 7.100 persoas que contan en Galiza cun patrimonio superior aos 700 mil…
comentarios