#sermos213: a realidade do galego nos concellos e o debate que cambia a campaña

Un novo número do semanario saído do prelo: co gallo do inicio do curso entrevistamos Anxo Louzao (CIG-Ensino), parloamos con Sés do divino e humano, mergullámonos na campaña electoral... Todo isto e máis, xa na nosa loxa.

Está o galego normalizado nos concellos do país? Esta é a pregunta que nos facemos e á que intentamos dar resposta na reportaxe 'O estado de saúde do galego nos concellos'. A decisión do goberno municipal de Vigo de incluír o castelán como lingua das sesións plenarias reabre o debate sobre a defensa do idioma por parte das administracións. Aliás, a presenza do galego en organismos estatais como a Seguridade Social, Facenda ou os xulgados continúa a ser unha excepción, mentres que aumenta a lexislación en favor do castelán.

SG123Entrevistamos Anxo Louzao, o secretario nacional da CIG-Ensino, o sindicato maioritario do sector. Explícanos o estado de saúde do sistema educativo da Galiza cando comeza o curso escolar. As reválidas en 4º da ESO e 2º de Bacharelato, cuxos contidos e deseños non teñen que seren revelados polo Goberno español até o 30 de novembro, marcan a campaña 2016-2017. “Chamaremos á insubmisión ás reválidas”, dinos.

'A Ribeira Sacra, o polígono industrial de Iberdrola e Fenosa'. Novos megaaproveitamentos hidroeléctricos pairan sobre unha das paisaxes naturais, culturais e humanas máis representativas da Galiza: a Ribeira Sacra. Trátase das centrais de bombeo de GN-Fenosa no Miño (Belesar III e Os Peares III) e no Sil (Edrada-Santo Estevo), así como da de Santa Cristina, de Iberdrola, tamén no Sil. Fóra da Ribeira Sacra, na bacía do Limia, tramítase outro grande aproveitamento (Salas-Cunchas), tamén de GN-Fenosa

A campaña

'O debate mostra as debilidades de Feijóo'. Nas vésperas do debate a cinco da CRTVG, o único non vetado por Feijóo nesta campaña, a dúbida nos ambientes xornalísticos e políticos era se aparecería e como Marcial Dorado no debate. Apareceu, si, invocado por Ana Pontón. “Sempre fun contundente coa corrupción”, dixo Feijóo. Ao non terse defendido da alusión a Dorado, soou a frase falsa. Aí perdeu o debate.

O PP lanza unha ofensiva con todos os seus recursos na procura da maioría absoluta e na conquista de todo o eleitorado da direita, sen dar opción a Cs. Aos ollos de Monte Pío, Rajoy non é un lastro para o partido. 'Feijóo nas cidades e Rajoy nas vilas'.

En 'O mundo non espera por nós' Xulio Ríos, director do Igadi, reivindica a importancia da acción exterior de Galiza cara ás eleccións do 25S. “Gobernar Galicia, ben sexa desde o local ou o autonómico, sen pensar no mundo só demostra que vivimos fóra da época, con parámetros doutro tempo. Esa fronteira na comprensión empobrécenos e réstanos posibilidades”.

'Bolivia: reaxuste das alianzas?' A reforma da Lei de Cooperativas provocou unha vaga de protestos no sector da minaría, nos que se entrecruzan os intereses da dereita opositora. A minaría é unha rama de actividade de grande importancia en Bolivia, representando o 6,24% do PIB e atinxindo 140.000 empregos.

Máis globalización

China aposta durante a cimeira de Hangzhou en profundar na mundialización da economía, mais coa pretensión de “civilizar” o capitalismo. O encontro das principais potencias mundiais estivo envolvido polas negativas previsións do FMI para a economía global, que fica inda lonxe de superar a crise iniciada en 2008. A cimeira saldouse sen acordos concretos relevantes e volveu servir de escenificación da pugna xeoestratéxica. 'Camiño de máis globalización?'.

O salario medio dos galegos medrou nestes meses catro veces menos que o español. E iso após un lustro no que o soldo dos asalariados da Galiza caeu máis que no Estado. Algo que afecta a case todos os sectores de actividade, en maior ou menor medida. 'Traballar moito, cobrar pouco'. En Análise achegámonos ás rémoras do medre económico e os seus riscos.

“Hai que vivir e sobrevivir”

Entrevistamos Sés, que está a piques de presentar o seu novo álbum de estudio, un disco no cal poderemos escoitar xéneros novos e músicas populares acompañadas de letras persoais, eclécticas e sinceras. “As letras son eu. Son viscerais, transparentes e sen preconceitos. Odio os preconceitos e as vergoñas”.

Carlos Negro debulla para Sermos Galiza 'Masculino singular', a súa obra máis recente. E en 'andar e ver' imos do Rexo (Allariz) a Xunqueira de Ambía, con varias posibilidades para coñecer unha ruta de beleza singular.

Felipe Senén proponos unha historia na que afondar, o ouro galaico. Unha das distincións deste estremeiro Oeste do Vello Mundo é a historia do seu ouro, a da minería e da súa delicada metalurxia. Abondan as fontes arqueolóxicas, as literarias, os mitos de buscatesouros, as etnográficas e mesmo a tradición dos ourives, e máis aínda será pola banda bracarense. Pese a tanta carcasa de “casas”, “cidades” e baleiros aparatos apelidados “de cultura” non se espalla, como merece, tan escintilante singularidade.

E na contra-capa, as dornas homenaxean Rosalía de Castro e no selfie-entrevista, Asier Basurto, un dos responsábeis do proxecto Tosta 2016, que estes días estivo por Galiza.

Ademáis, netse número temos as opinións de María Pilar García Negro e de Xavier Queipo. Alberte Ansede, en 'As lúas de outono', volve percorrer para nós a obra de Manuel María. Na crítica literaria Mario Regueira debulla o poemario 'Corazón e demais tripas', de Emma Pedreira. Andrés Castro achégase a 'Espías desde o ceo' (Eye in the Sky), de Gavin Hood. Na súa sección 'Botar un ollo' Pepe Barro fala do «Cadrado branco sobre fondo branco», a pintura coa que Malevich acada o cenit do Suprematismo, como denomina o ruso a súa busca pictórica do esencial.

Máis en Só en papel
Só en papel
Máis un número do Sermos Galiza saído do forno. Falamos das persoas sen fogar no noso país, entrevistamos Francisco…
Só en papel
Máis un novo número saído do prelo. Falamos das perto de 7.100 persoas que contan en Galiza cun patrimonio superior aos 700 mil…
comentarios