Sermos Galiza nº181. Novo deseño, nova pel para un semanario que mantén a aposta e o compromiso no xornalismo galego. Estreamos deseño nun número que sae do forno ben completo de contidos. O Tema de primeira é Ence, que tratamos na reportaxe 'O derradeiro favor do PP a Ence'. Completámola con entrevistas ao alcalde de Pontevedra, Fernández Lores, e e ao presidente da Federación de Asociación de Veciños 'Castelao', Juan Loureiro. Antón Masa, presidente da APDR, escrrbe unha columna de opinión.
En 'Integrar asimilando' analizamos a integración como reto político. A crise de persoas refuxiadas está a marcar a axenda política internacional e, no concreto, a europea. O avanzo do discuso xenófobo e da extrema dereita sitúan a integración social no cerne do debate político, mesmo na Galiza, após seren adoptadas polémicas medidas como a confiscación de bens en Dinamarca.
'Entroidar no sur de Lugo'. O Oso de Salcedo, os Mecos, Máscaras e Peliqueiros de Chantada. O Sur de Lugo mantén vivas moitas tradicións e ritos vencellados á festividade do Entroido. Algunhas delas foron resgatadas da memoria popular após ficaren prohibidas polo fascismo. Outras, tentan sobrevivir á perda de poboación das parroquias nas que se desenvolveron durante séculos.
Falamos dalgunhas das tradicións que atopamos en Entroido na Ribeira Sacra
![Publicidade 195255]()
En 'Un semanario remozado para un ollar máis fondo' falamos do novo deseño e información selectiva que caracterizan esta etapa do SG. Sermos Galiza volta aos quiosques con nova faciana, un deseño innovador e actual obra de Pepe Barro, un dos grafistas máis recoñecidos do país. Amais das mudanzas físicas, o semanario incorporará contidos de máis análise, profundidade e investigación. "Sermos ten espazo e posibilidades de se consolidar como un medio referencial", confésanos Xoán Costa, presidente do Consello de Administración, nunha entrevista.
"Creo nun debate sen tabús para a refundación”
Entrevistamos Francisco Jorquera (Ferrol, 1961), unha das voces ás que se presta máis atención dentro do Bloque Nacionalista Galego. Non só por ser o portavoz do grupo parlamentar, senón pola súa capacidade para o diálogo dentro da casa. Licenciado en Xeografía e Historia ten o percurso histórico do nacionalismo galego na cabeza, mais prefire pór as luces largas e ollar para o futuro. Ten ideas e propostas para o BNG saír da crítica situación na que se acha. “Son tempos de ter a cabeza fría e analizar a fondo que cambios houbo na sociedade”.
Afondamos nas cuestións que marcarán a axenda muncial para 2016
![Publicidade 195536]()
En 'Axenda mundial para 2016' repasamos os principais asuntos e problemáticas que determinarán a axenda internacional este ano. Das eleccións en EUA até o TTIP, pasando polos refuxiados. 'Novos Estados no mundo: independência para algo mais' é un artigo de análise no que se debullan as causas que estimulan os procesos independentistas en andamento no mundo.
E detémonos en Bernardino Rivadabia, un galego que foi o primeiro presidente de Arxentina. Alcumado como Doctor Chocolate polos seus adversario políticos. Motivo? Posíbel ascendencia africana. Non existe documentación que acredite tal hipótese. O que é seguro: a súa orixe galega.
Galiza no seu sae-se-podes
Cunha taxa de actividade do 53% (apenas da metade dos galegos de 16 e máis anos é poboación activa), Galiza áchase fronte a un desafío para nada menor: ser viábel. Factores como o avellentamento ou a emigración estrutural, entre outros, deixan pegada nunha taxa de participación das máis baixas da súa contorna europea. Corremos, pois, o risco de sermos un país insostíbel, embora o potencial produtivo que temos. Tratamos esta cuestión en 'Un país baixo ameaza de ermo laboral'.
Maria do Cebreiro e Abe Rábade falan da segunda xeración da cultura galega
Conversamos con María do Cebreiro e Abe Rábade. Son xa segunda xeración de ‘persoeiros’ da cultura galega. Fillos dos escritores Helena Villar e Xesús Rábade, criáronse xuntos e confesan que “temos case telepatía. Houbo quen nos chamou monstro bicéfalo” (e escachan a rir). Pronuncian palabras ao unísono, un completa as frases do outro e comparten a ilusión polos cambios sociais que estamos a vivir.
Fóra de serie
Da man do colectivo Xea percorremos A Eira de Padrendo, conxunto de 17 canastros ao pé da serra de Santa Eufemia. Unha pequena xoia a atopar en Ourense.
E na nova sección 'Fóra de serie', temosm axenda, consellos, gastronomía, viños, libros, cinema... Un espazo dinámico e aberto. E nesta volta acompáñanos o deseñador Pepe Barro falándonos da importancia da letra R do ismo vangardista primeiro.
E aínda hai máis, Xan G. Muras proponnos un calendario para o mes de febreiro, Preguntamos a 'pistola-no-peito' a Samuel L. Paris (poeta que toca o baixo ou baixista que escrebe poemas) nunha mini-entrevista con 'selfie', falamos do danés que mirou dentro de nós...