No cuarto ano da súa existencia, Sermos muda de pel para exhibir unha imaxe máis innovadora, cuxa característica principal é a cor, pois todas as páxinas do semanario se apresentarán con todos os seus matices de colorido. A mudanza de pel do periódico vai alén da cuestión gráfica, xa que se implementarán quer melloras na calidade do papel, dunha gramaxe superior á actual, quer na impresión. Ademais, a nivel xornalístico, ofreceremos contidos de máis profundidade, análise e investigación e contaremos con novas sinaturas que alargan o abano de colaboradores e colaboradoras habituais.
Unha das principais características do novo deseño, amais do uso da cor, cuxas formas principais son o negro, seguido do vermello e do azul, é a tipografía
Unha das principais características do novo deseño, amais do uso da cor, cuxas formas principais son o negro, seguido do vermello e do azul, é a tipografía. A iniciativa de Pepe Barro, Sermos Galiza empregará un tipo deseñado por Marcos Dopico, doutor en Tipografía e profesor da Universidade de Vigo, quen na súa tese estudou a evolución dos tipos de letra chamados de pau, sen remates, que son os tipos da contemporaneidade, como o MáisGrotesk cos que se escribirá o meirande número de páxinas do novo semanario. Este tipo conta con cinco pesos con cadansúa cursiva e a súa atención aos detalles máis minúsculos fornece a letra dunha calidez que non se atopa noutros paus secos, tal e como advirte o deseñador do novo Sermos. O tipo Georgia de Matthew Carter achégalle variedade ao papel e desenvolve todo o segundo corpo da publicación.
O novo Sermos contará con dous corpos diferenciados. No primeiro deles, incorporarase a información xeral -tema de primeira, opinión, sociedade, política, internacional e economía- amais do A Fondo, o caderno monográfico que recollemos en cada número. O segundo corpo é o dedicado á sección que estreamos, denominada Fóra de Serie. Dedicarémoslles as oito páxinas desta nova sección, cuxo deseño é máis efervescente, a unha variedade de temáticas que abranguen desde a literatura, á música, pasando polo teatro, o cinema, a pintura, o patrimonio, a historia, a banda deseñada, a moda, o deseño, fotografía, gastronomía, lecer ou innovación, entre outras. Para estas páxinas, contaremos con novas sinaturas, como a de Xurxo Souto; que escribirá sobre música, Felipe Senén, sobre patrimonio; de Olaia Ledo, sobre cinema; Manuel Xestoso, sobre teatro; Uxío Breogán Diéguez, sobre historia, ou Mónica Pazos, sobre literatura infantil e xuvenil.
Guillerme Vázquez e Antón Losada son algunha das novas sinaturas da sección de Opinión
![Publicidade 195255]()
A respecto da sección de Opinión, ás columnas dos colaboradores e colaboradoras habituais –Pilar García Negro, Xavier Queipo e Luz Darriba- incorporaremos sinaturas como a de Guillerme Vázquez, ex portavoz nacional do BNG, ou a de Antón Losada, profesor de Ciencias Políticas na USC. Na sección de Política, contaremos con colaboracións do analista Manuel Monge e do politólogo Manuel Anxo Fernández Baz.
Consolidación do medio
Xoán Costa, presidente do Consello de Administración, afirma que a mudanza gráfica en Sermos Galiza dá resposta “ao mandato da Xunta Xeral de accionistas que nos encarregou buscar, a través dun novo deseño, e tamén dunha nova estrutura, a consolidación do medio, ao tempo que chegamos a novas leitoras e leitores”. Engade que as modificacións “veñen dadas para marcar claramente camiños separados entre o dixital e o papel, procurando que este aborde o tratamento da información de maneira mais pausada, o que non significa fóra da actualidade”. Pon de manifesto que “queremos demostrar que é posíbel facer un medio en que teñan cabida todos os intereses galegos”.
O presidente do Consello de Administración considera que “o feito de sermos o único exemplo de semanario en galego xa é un valor engadido para nós. Daí o mandato da Xunta de Accionistas: consolidar o medio e dalo a coñecer entre toda a sociedade”. Engade que “cando consigamos isto, ese será o verdadeiro valor de Sermos Galiza”.
O galego, nos quiosques
Mexuto: "Imos aprofundar liñas, a análise, a reflexión, e en todo caso ensancharmos algúns regos, nomeadamente o do xornalismo de investigación"
“Este novo Sermos é en realidade un impulso nunha dirección xa explorada no proxecto desde o seu inicio”, explica Xosé Mexuto, director do semanario, que salienta que “o que imos facer é aprofundar liñas, a análise, a reflexión, e en todo caso ensancharmos algúns regos, nomeadamente o do xornalismo de investigación”. “Falarmos de xornalismo de investigación é quizá un tanto pomposo e non sempre está ao alcance dos recursos propios. Mais a nosa vocación está aí, a de revelar as verdades incómodas para os poderes. Nunha palabra, facer xornalismo. Iso vaise ver moi claramente na orientación da reportaxe que abra cada número”, expón. E é que cada semana dedicaremos as primeiras páxinas do Sermos a debullar con profundidade asuntos de interese xeral na sección Tema de Primeira.
Xosé Mexuto subliña que Sermos é necesario porque “é ante todo un proxecto social, xurdido da base da nosa nación. É necesario porque o que producimos, un semanario en lingua galega, é un produto único, o que garante a presenza do noso idioma nos quiosques”. “Esa condición -infeliz, xa nos gostaría estarmos acompañados!- supón unha enorme responsabilidade para a Redacción de Sermos, mais tamén en certo xeito, e dígoo con humildade, un orgullo”, sinala. “Sermos é necesario porque na Galiza é necesario, é indispensábel, o xornalismo galego, o xornalismo comprometido co país. O que conta o que sucede con óculos propios, non cos ollos de Madrid", resume o director do semanario.