Un nadal no rural

Falar do Nadal é falar da familia, de ceas infinitas e de xuntanzas coas persoas que queremos. É falar da volta á casa, de viaxes e de reencontros. Mais este ano nada diso vai poder pasar. A situación de pandemia debida á Covid-19 vai mudar estas festas do mesmo modo que tamén cambiou o verán, a volta ao curso, os traballos e calquera ámbito das nosas vidas. Ora ben, o feito de que este Nadal vaia ser diferente non quere dicir que vaia ser peor. Existen numerosas alternativas que permitirán desfrutar destas datas dunha maneira segura e consciente. Entre elas están as casas rurais. Este verán comprobamos como unha boa parte da poboación galega preferiu pasar as súas vacacións no rural e a montaña en lugar de escoller os destinos turísticos habituais para evitar as aglomeracións de xente. O rural proporciona esa seguridade que tanto demandamos nestes tempos e as casas afastadas das cidades e das multitudes resultaron ser a mellor opción para pasar o verán. O turismo rural propón moitas actividades para realizar de forma segura e tranquila, lonxe das aglomeracións, que contribúen, ademais, a mellorar a nosa saúde física e mental. Do mesmo modo que sucedeu no período estival, é lóxico pensar que nas próximas festas de Nadal volva producirse ese auxe cara ao illamento que proporcionan estes estabelecementos. Con todo, a incerteza que supón a situación actual de pandemia, na que as restricións sanitarias cambian constantemente, está a provocar unha certa preocupación entre as persoas propietarias deste tipo de aloxamentos. Algunhas ollan con optimismo a chegada destas datas; outras séntense completamente perdidas e sen saber realmente que facer. En xeral, non pensan que nestas festas vaia haber tanta clientela como no verán a causa, principalmente, das restricións de reunións e de mobilidade. Mais as ganas de saír seguen presentes e, o que si está claro é que, pase o que pase, as casas rurais sempre serán un lugar seguro no que poder gozar do Nadal en familia aínda que sexa dunha forma diferente. A situación actual das casas rurais Para calquera dos sectores vinculados ao turismo, a pandemia está a supor un grande obstáculo. Porén, o turismo rural, aquel situado lonxe das grandes urbes, que ofrece espazos abertos, tranquilidade e illamento, parece a opción máis segura para viaxar. José Manuel Villapol, propietario da Finca Goleta, un aloxamento rural situado en Foz, expón que "o turismo rural é un segmento de turismo que ten boa perspectiva no momento no que nos atopamos porque a xente demanda natureza e estar ao aire libre". Isto non significa que a situación actual sexa óptima pois a adaptación ás restricións que se lle impón á hostalaría está a ser moi dura. Os propietarios e propietarias destes aloxamentos vense dobremente afectados: por un lado, a maior parte da clientela das casas rurais non pode saír das súas cidades a causa das restricións perimetrais; por outro, a pesar de teren poucas e poucos clientes, non poden optar ás axudas da hostalaría porque a maioría deles continúan abertos. "Quedamos sen clientes e sen axudas", argumenta María Varela, propietaria da Parada das Bestas, situada preto de Palas de Rei. As persoas propietarias destes aloxamentos demandan unha maior visibilidade da súa situación, pois tamén precisan axudas para seguir adiante. Ángel Martínez, propietario da Abadía Eiras, nas proximidades de Tui, opina que a pandemia si trouxo algo positivo e foi a importancia que logrou o rural. Martínez desexa que esta posta en valor do turismo rural tamén se vexa apoiada por parte das institucións que non están a prestar a este sector a atención que precisa. Outro claro problema que enfrontan as casas rurais é o provocado polas restricións de mobilidade, que lles afectan tanto no ámbito galego como no estatal e, evidentemente, no internacional. Mabel Vidal, responsábel de Casa de Cacheiro de Silleda, indica que están moi condicionados polas restricións, que afectan quer ao persoal laboral quer ás e aos hóspedes. As vantaxes do turismo rural Todos os propietarios e propietarias consultadas dos diferentes estabelecementos rurais concordan na visión negativa en relación ás reservas de cara ao Nadal. Porén, tamén coinciden na convicción de que o turismo rural é a mellor opción para desfrutar destas festas de forma segura. As casas rurais ofrecen un medio natural e espazos abertos; son perfectas para evitar a masificación propia das grandes cidades e dos destinos turísticos habituais. Ademais, o turismo rural non se reduce só á estancia nunha casa illada, senón que permite o descubrimento dunha comarca enteira, das súas paisaxes, dos seus produtos e das súas formas de vida. As casas rurais presentan todas as comodidades precisas para gozar da estancia nelas e, ao mesmo tempo, están preto de moitos lugares de interese que os clientes e clientas poden visitar evitando aglomeracións. Villapol engade que están a propor un destino e toda a súa contorna. "No noso caso ofrecemos a Mariña, que é unha área enorme para coñecer máis alá da miña casa". O turismo rural debe ir da man da economía local, debe supor un apoio máis a esta. O illamento que proporcionan as casas rurais nun espazo natural e aberto non o pode ofrecer calquera tipo de hostalaría. Varela defende que a pouca densidade de clientela e a natureza supón unha gran vantaxe competitiva neste momento. A seguridade que tanto se está a demandar é o punto chave que marca a diferenza neste tipo de turismo. Ao situárense en plena natureza, existen moitas posibilidades para pasar o día en familia ou con amizades: practicar sendeirismo, ciclismo, piragüismo e outros deportes acuáticos, dar paseos a cabalo, visitar os puntos de interese turístico da comarca, degustar a gastronomía local, coñecer as tradicións populares do lugar... ou simplemente relaxarse nas comodidades do estabelecemento Cada casa rural presenta as súas propias vantaxes a respecto doutras. Varela, por exemplo, explica que A Parada das Bestas conta con apartamentos que para unha familia de catro persoas sería unha opción perfecta para celebrar o Nadal. Son estancias totalmente completas nas que os clientes e clientas se poden sentir como na casa. Ademais, neste aloxamento comezaron a servir a comida envasada para que as persoas non teñan necesidade de ir ao comedor e poidan levala directamente ao apartamento para evitar o contacto co resto dos hóspedes. "É unha moi boa forma de que as e os visitantes poidan desfrutar da nosa cociña e das vacacións no rural sen medo", engade Varela. Pola súa parte, Martínez indica que a Abadía Eiras conta con zonas moi amplas nas que as e os hóspedes poden manter a distancia requirida sen problema. Cómpre destacar tamén que a casa rural ten todos os cuartos independentes con cadanseu aseo, polo que se pode evitar o contacto no caso de viaxar con amizades ou con persoas achegadas que proveñan doutros lugares. Na mesma situación encóntrase Casa Vixide pois, como indica Pilar Rodríguez, a propietaria deste estabelecemento de Lalín, "ao ser unha casa completa non existe ningún perigo, a diferenza doutros aloxamentos que se alugan por cuartos". É evidente que aínda non se sabe que vai pasar no Nadal e as restricións seguen sen estar claras dada a súa continua actualización. As casas rurais deberán ir adaptándose ás medidas que se vaian comunicando, pero o que resulta incuestionábel é que os seus propietarios e propietarias esperan cos brazos abertos a chegada dos visitantes que queiran gozar delas. Os selos de calidade Para colaborar na xestión e promoción das casas rurais existen diferentes tipos de selos de calidade que ofrecen unha garantía do estado dos aloxamentos a aquelas persoas que queiran formalizar unha reserva. Entre estes certificados destaca o de Galicia Calidade, que se centra nos produtos alimenticios, materias primas, deseño (de moda, de construción...) e hostalaría, principalmente. Este certifica a calidade de produtos e servizos avalada pola súa orixe galega. Para que as empresas poidan conseguilo, deben cumprir certos requisitos e someterse a diferentes auditorías que demostren a súa calidade. No que ás casas rurais se refire, as condicións están maioritariamente ligadas ás súas infraestruturas e servizos. A este súmanse outros, como o selo Q que outorga o Sistema de Calidade Turística Español. Os selos supoñen unha grande axuda na xestión do aloxamento e na promoción deste cara ao público. Moitas persoas decántanse por unha casa rural determinada precisamente polo feito de que esta posúa o certificado de Galicia Calidade, pois este proporciona moita confianza e unha garantía de que o aloxamento vai estar en óptimas condicións e de que se van cumprir uns parámetros de calidade. Vidal indica que "no verán todos os visitantes que reservaron en Casa de Cacheiro tiveron moi en conta o selo para viren porque saben que detrás del existen auditorías que velan polo cumprimento das normas. Crean seguridade e confianza, porque saben que cando cheguen van atopar o que reservaron; non vai haber sorpresas". Con todo, parece que a existencia destes selos non é suficiente. Villapol argumenta que "o problema do turismo rural é que está moi segmentado e non ten unha catalogación exacta como si presentan os hoteis. Existen os pazos e as casas de labranza, mais ao resto de casas rurais métesenos no mesmo saco e somos moi diferentes". Na súa opinión, toda a hostalaría precisa dunha catalogación acorde co que se ofrece. Pola contra, Martínez pensa que "non se necesitan máis catalogacións, senón mellorar aquelas que xa temos". Que haxa unha maior cantidade de selos non significa que vaian ser mellores, polo que se debe aspirar a uns certificados completos que realmente promovan os aloxamentos e que creen confianza nos clientes e clientas. Perspectivas de futuro No que ao futuro das casas rurais se refire, as persoas propietarias destas manifestan un certo optimismo. A curto prazo é moi probábel que este tipo de turismo sexa o máis demandado a causa da situación sanitaria que estamos a vivir, da mesma forma que o foi no verán. Parece incuestionábel que as e os visitantes manteñen a ilusión de saíren e de coñeceren novos lugares. Vidal explica que moitos hóspedes teñen moitas ganas de viaxar, tanto desde unha perspectiva do turismo convencional como dentro do fenómeno da peregrinación. "Coa ilusión que transmite todo o mundo que se pon en contacto connosco, eu creo que o futuro vai ser moi bo", engade. A volta á vida rural semella irremediábel. Mais cómpre entender o rural como unha forma de vida máis sustentábel e ecolóxica. Estes valores están a ser moi demandados dada a situación de pandemia, polo que representan un plus de garantía para as casas rurais. Porén, é preciso termos sempre presente que primeiro deberá normalizarse a situación epidemiolóxica para que as actividades turísticas poidan voltar á normalidade. Ademais, ese retorno deberá ser tranquilo, seguro e moi consciente; e o turismo rural vai poder garantir esas condicións.