A linguaxe de bronce: o murmurio das últimas badaladas

Desde hai centos de anos, o son das campás fica incorporado á nosa vida cotiá como un elemento máis que identifica as nosas vilas, parroquias e cidades. Malia que na actualidade o seu protagonismo semella estar a esmorecer, noutro tempo pretérito, os seus tanxidos e repeniques xogaron un papel fundamental á hora de transmitirlle á veciñanza os acontecementos máis relevantes que se producían en cada núcleo de poboación. Porén, e coa axuda dun dos campaneiros máis lonxevos da Galiza, abordamos a orixe e a evolución das campás, repasando algúns dos toques máis senlleiros da linguaxe de bronce.