400 pasos: Sermos Galiza continúa sumando

Agradecidas e agradecidos. Así é como nos sentimos ao sumar 400 números co semanario en papel Sermos Galiza, que vía a luz o 8 de xuño de 2012. Unha publicación que mudou ao longo destes anos para enriquecer un proxecto comunicativo que foi medrando e que callou, o pasado xaneiro, na saída do xornal Nós Diario, o único diario en papel en galego. Estes números evidenciaron que estamos ao servizo dos intereses galegos e, por tanto, contribuíron e contribúen a facer país e a difundir unha axenda propia, centrada na Galiza, sobre temas que nos interesan a todas e todos e que se botan en falta nos medios de comunicación tradicionais. A lingua é un dos nosos principais signos de identidade, mais non só. Este semanario pon énfase na cultura e na memoria, dada a necesidade de desvendar tópicos que negan as capacidades da Galiza e a nosa autovalía como pobo galego. Moito máis que unha cifra Foron 400 exemplares nos que falamos desde nós e para todas e todos, do social e do común, de política e de economía, de cultura, de educación, doutros países e doutras realidades, de deporte, lecer, viaxes, arte, deseño, fotografía, tecnoloxía, historia, memoria... 400 exemplares cos que camiñamos sempre na procura de ofrecer un xornal digno, de calidade e que procurou e segue a procurar novos territorios. 400 exemplares en que non faltaron críticas e pexas, das que tomamos nota, sabendo que nos farán mellores. 400 exemplares nos que quixemos partillar voz con todas aquelas persoas que acreditan que somos quen de facer e de construír xornalismo galego e en galego para explicar e explicármonos, para informar e informármonos. 400 exemplares dun proxecto ilusionante compartido por moitas persoas e que quere chegar aínda a moitas máis. Agrandar a base social A cifra 400 só ten sentido se é para superala, ampliala e enriquecela con máis semanarios. Os 400 números mostran o camiño percorrido até hoxe, ao tempo que representan unha invitación para sumar en todo o que nos fica por percorrer. Un futuro no que queremos seguir a existir por nós mesmas e nós mesmos, pois o noso modelo de financiamento, baseado de maneira maioritaria nas subscricións, permítenos ser independentes e posibilitan que poidamos practicar un xornalismo crítico que non estea amordazado nin polas subvencións nin polas grandes empresas nin pola banca. Se te subscribes á edición en papel ou a réplica para a lectura en liña, estás contribuíndo a agrandar o espazo informativo da lingua galega e a facelo con información centrada na Galiza e con calidade. Foi un verdadeiro orgullo e pracer partillar estes 400 números con persoas subscritoras, accionistas, lectoras e colaboradoras. E, sobre todo, con todas as traballadoras e traballadores que formaron e que forman parte desta casa, a redacción, a xerencia e os membros do Consello de Administración -con Xoán Costa á cabeza-, pois sen eles, este papel que tes hoxe na man non sería posíbel. Comprometémonos a seguir dando o mellor de nós para manter a vosa confianza e para gañar a de máis lectoras e lectores. Comprometémonos a seguir facendo xornalismo galego, na procura de fortalecer un proxecto de comunicación necesario para a Galiza. Queremos seguir a partillar moitos números máis. Parabéns a todas e todos e obrigadas!