Ángeles Vázquez, conselleira de Medio Ambiente, defende que Ence non contamina a ría de Pontevedra e cumpre con todos os “parámetros exixíbeis”. “Cando hai un cumprimento, pode estar situada onde está”, engadiu. A titular do departamento da Xunta fixo estas declaracións nunha entrevista na cadea Ser. Ao ser preguntada pola xornalista de onde procede logo a contaminación da ría, Vázquez respondeu que “habería que lle preguntar ao Concello de Pontevedra”.
"Se dicimos que os parámetros de coliformes son máis dos que deberan estamos falar de depuradoras e habería que analizar que pasa coas depuradoras", dixo, para engadir a seguir que "a nivel ambiental o cumprimento é estrito e non hai ningún parámetro alarmante en relación con Ence".
Nas últimas semanas diversos rostros do goberno galego, incluído o presidente Núñez Feixoo, saíron na defensa de Ence e da súa actual ubicación.