sábado 08/08/20

A Xunta inicia mañá a última inspección de colexios electorais

O obxectivo é comprobar que, após a instalación de todo o material e mobiliario necesario, respecten as medidas de prevención sanitarias fronte á COVID-19
Mesa electoral nas eleccións galegas (Foto: EP).
Mesa electoral nas eleccións galegas (Foto: EP).

A Xunta iniciará mañá a última inspección dos 2.405 colexios electorais previstos para os comicios do 12 de xullo, co obxectivo de comprobar que, após a instalación de todo o material e mobiliario necesario, respectan as medidas de prevención sanitarias fronte á COVID-19.

Segundo asegura a Xunta, na primeira quincena do mes de xuño este persoal despregado para ese efecto xa realizou inspeccións previas dos locais electorais, nas que se garantiu que "o 100%" respecten as pautas de saúde pública. De feito, esta sexta o coordinador de prevención dos comicios, Emilio de la Iglesia, participou nunha demostración de seguridade no Centro Sociocultural Pedro Barrié de la Maza de Sergude, en Boqueixón (A Coruña).

Ademais destas revisións, durante a propia xornada do 12 de xullo haberá en todos os colexios un equipo da Administración con funcións de vixilancia e supervisión para asegurar medidas como distancias de seguridade, o uso de máscara e xel desinfectante --que se facilitarán nos propios locais--, así como os controis de acceso para evitar as aglomeracións e  dar prioridade ás persoas maiores de 65 anos ou con algunha discapacidade.

Así mesmo, haberá cartelaría para facilitar o seguimento de todas as pautas sanitarias, sinalizarase o percorrido e os fluxos de entrada e saída aos colexios e o mobiliario para os integrantes das mesas estará colocado "de modo que se manteña a distancia de seguridade, do mesmo xeito que na zona que ocuparán interventores e apoderados" dos partidos, explica a Xunta.

Cabe lembrar que nas mesas haberá unha bandexa na que os cidadáns deberán depositar o DNI antes de introducir o seu voto na furna, co obxectivo de rebaixar ao mínimo o contacto entre persoas.

comentarios