A Xunta avalía levar ao Constitucional as normas do Goberno español para a desescalada

Apela a un cambio entre terza e cuarta feira para evitalo, xa que se a normativa "segue sendo ríxida" o seu executivo recorrerá ao TC.

Alberto Núñez Feixoo (Foto: Arxina).
photo_camera Alberto Núñez Feixoo, após unha reunión semanal do Consello da Xunta da Galiza (Foto: Arxina)

O presidente da Xunta, Núñez Feixoo, avanzou que a Xunta estuda a posibilidade de presentar un conflito de competencias ante o Tribunal Constitucional contra as medidas adoptadas polo Goberno español para a 'nova normalidade' após a pandemia de coronavirus.

A preguntas dos xornalistas após un acto en Santiago, Feixoo adiantou que a asesoría xurídica do Executivo galego "ten xa avanzada a posición" en relación coas medidas que o Goberno estatal publicou no Boletín Oficial do Estado (BOE).

Aínda que "é certo que a redacción última do Goberno español é un pouco máis ampla que a inicial" e "xa non é obrigatorio para as comunidades seguir os parámetros epidemiolóxicos que sinalaba como obrigatorios a resolución inicial", o que o presidente galego valorou como "un avance", subliñou que segue "en desacordo cun horario ríxido para a hostalaría e cunha norma ríxida ata que se consiga a inmunidade polo número de persoas vacinadas en España".

"Con estas dúas consideracións estamos a estudar a posibilidade de presentar un conflito de competencias. Entendemos que hai unha invasión das competencias da comunidade autónoma e a asesoría xurídica está a avaliar a posibilidade de presentar un recurso de incompetencia ante o Goberno español. Neste caso sería ante o Tribunal Constitucional", resaltou Núñez Feijóo.

Con todo, asegurou que lle gustaría "non ter que facelo", polo que apelou a que, "da mesma forma que entre o texto inicial e o publicado houbo unha variación en positivo", ambas as partes -Goberno central e territorios- volvan "outra vez a sentar a axustar esa resolución".

E é que, segundo incidiu o titular da Xunta, o seu Executivo entende que esta normativa "invade competencias das comunidades". Ademais, critica que "esixe uns horarios en xuño que non son os que probablemente sexan imprescindíbeis en agosto para hostalaría".

Por iso, pide "que deixe á comunidade proceder" con base nos protocolos que determina o seu comité clínico, que, de feito, reúnese esta terza feira. "Imos ver se o Goberno español quere seguir avanzando nese acordo", chamou a atención.

Comentarios