Alberto Núñez Feixoo é esencialmente unha construción mediática. A mesma articulouse arredor da imaxe transmitida por unha boa parte dos medios galegos, moi particularmente aqueles de titularidade pública, e dos estatais, fundamentalmente aqueles asentados en Madrid.
Neste operativo, resultou decisiva a achega dunha serie de grupos de comunicación madrileños non aliñados, mecanicamente, coa dereita e o PP, que puxeron en valor a súa acción de goberno como vía para debilitar outros liderados dentro do partido.
A xestión económica de Feixoo foi situada durante anos como exemplar pola case totalidade do espectro mediático. Porén, o líder dos populares incrementou a débeda galega en 7.360 millóns de euros, após coller o país a comezos de 2009 cunha débeda de 3.954 millóns de euros e deixalo en marzo de 2022 con 11.324 millóns de débeda -equivalente a 3.680 euros por habitante-. Asemade, os seus anos á fronte da Xunta coincidiron cunha importante desaparición de postos de traballo nos diversos sectores de actividade.
Os datos de destrución de emprego non deixan en boa situación o anterior presidente galego. Sen ir máis lonxe, a Galiza perdeu desde marzo de 2009 até febreiro de 2022, 23.213 traballadores autónomos, pasando en 13 anos de 231.158 a 207.945. Outro tanto aconteceu no complexo industrial, destruíndose ao longo do seu mandato 33.555 empregos e caendo nese período o Índice de Produción Industrial (IPI) en 35 puntos. Os datos referidos ao sector agrario non resultaron mellores, fechando desde 2010 até a súa marcha a Madrid en marzo deste ano 15.986 explotacións gandeiras de bovino.
O gasto sanitario
Os servizos públicos resentíronse durante os anos de Feixoo na Xunta. Así, o investimento en Atención Primaria caeu neses 13 anos en máis de 350 millóns de euros, pasando de 1.437 millóns en 2009 -que coa suba do Índice de Prezos ao Consumo (IPC) equivalerían hoxe a 1.800 millóns-, a 1.389 millóns de euros en 2021. A este respecto, a última enquisa de gasto sanitario público, elaborada polo Ministerio de Sanidade neste ano, pon Galiza á cola do Estado -tras Madrid- en gasto en Atención Primaria, con só 11,6% do orzamento.
O sistema educativo presenta unha situación análoga. Neste sentido, o investimento en educación caeu 4% entre os cursos 2009/2010 e 2021/2022, fechando durante o período 146 centros educativos públicos e incrementándose os concertos educativos en 140. Asemade, neses 13 anos reduciuse en 19,6 millóns de euros a contía destinada a bolsas educativas para estudantado con menos recursos. Unha parte destes víronse obrigados a abandonar Galiza, tendo emigrado de 2009 a 2019 un total de 73.512 mozas e mozos entre 16 e 29 anos.
