Vox volve colleitar os seus peores resultados nas nacións sen Estado

Nas eleccións europeas Vox ficou por baixo de 3% dos votos na Galiza, Euskal Herria e Catalunya, territorios onde nas municipais ficou sen representación agás no concello catalán de Salt.

vox abascal

Como acontecera nas eleccións xerais do 28 de abril, Vox volveu topar este domingo, nos comicios municipais e europeos, coas nacións sen Estado. Non logra ningunha representación na Galiza nin en Euskadi, mentres que en Catalunya só atinxe presenza no concello de Salt, onde entra con 3 edís. O partido de extrema dereita logrou no conxunto do Estado español 659.000 votos nas municipais, obtendo 530 concelleiros e concelleiras e 5 alcaldes.

Na Galiza Vox presentou candidatura en 13 concellos. Entre todos eles sumou menos de 10.000 votos. Mesmo naquelas prazas, A Coruña e Ferrol, onde algunhas enquisas e sondaxes previas daban algunha posibilidade aos de Santiago Abascal de entrar, ficaron finalmente ben lonxe de conseguilo. En Ferrol tiveron 1% dos votos e na Coruña quedaron en 2%.

Mais é nas europeas onde máis claramente se ve o fracaso de Vox nas nacións sen Estado. Nesta cita Vox sumou en todo o Estado español perto de 1.400.000 votos, obtendo así tres representantes no Europarlamento. Atinxiron 6,2% dos votos. Porén, na Galiza, Euskal Herria, Catalunya ou Canarias os ultraespañolistas ficaron lonxe desa porcentaxe.

Euskadi é o territorio onde Vox recolle menos apoios. A súa candidatura ao Europarlamento obtivo 13.000 votos, o que é apenas 1% dos sufraxios emitidos. A seguir figura Catalunya, onde recibiu 68.000 votos, 1,9% do total. Na Galiza o apoio foi de 2,5%, 37.000 sufraxios. Nas Illas Canarias Vox quedou en 3,3% dos apoios nas urnas e en Nafarroa esa porcentaxe foi de 4%.

Vox logrou os seus mellores resultados en Ceuta (20,5% dos votos), Murcia (11%), Melilla (10,7%) e Madrid, con 9,8%. Por riba de 8% estivo só en Castela-A Mancha (8,2%). En Aragón, Andalucía, Asturies e Castela-A Mancha tivo apoios por riba de 7%. En Cantabria logrou 6,8%, en Estremadura 5,6% e na Rioxa 5,2%.

Comentarios