luns 28/09/20

"Por un voto decídese un Goberno", avisa Caballero

O candidato do PSdeG á Presidencia da Xunta, Gonzalo Caballero, fixo un chamamento neste sábado de reflexión a unha participación "masiva" nas eleccións galegas. "Por un voto decídese un Goberno", asegurou.

O candidato do PSdeG, Gonzalo Caballero, estivo en Ponteareas coa familia na xornada de reflexión (1)
O candidato do PSdeG, Gonzalo Caballero, estivo en Ponteareas coa familia na xornada de reflexión (1)

Este sábado de reflexión Gonzalo Caballero, candidato do PSdeG á Presidencia da Xunta, estivo en Ponteareas xunto á familia. Desde alí, fixo un chamamento a unha participación "masiva" nas eleccións galegas deste domingo e apelou a que se "vote en liberdade, polo progreso e polo benestar do país".

Desta forma, instou a "que ningunha galega nin galego quede en casa". "Se hai unha participación masiva gañamos todas e todos", asegurou o candidato.

Neste sentido, espera que haxa unha participación "alta" e con todos os mecanismos de seguridade, nunhas eleccións que supoñan "saír desta crise sen que ninguén quede atrás".

Así, Caballero apuntou que afronta os comicios deste domingo tras unha campaña "en positivo", "con propostas, digna, honrada e ilusionante".

Preguntado sobre se pode durmir un candidato á Xunta antes dunhas eleccións, Caballero dixo que dorme "moi ben todos os días do ano", aínda que sexan "poucas horas". "Son dos que cando me deito quedo durmido en menos de dous minutos e a verdade é que non teño ningunha dificultade", explicou.

comentarios