O portavoz parlamentar de En Marea, Luís Villares, asegurou este domingo que a súa formación non ten “ningún interese” en poñer o dereito a decidir en “ningunha axenda”.
Villares defendeu que “Galiza é unha nación e o dereito a decidir é un dereito que nos asiste”, mais considerou que “non existe unha pulsión social arredor do seu exercicio”.
"Simplemente somos titulares dese dereito", afirmou o portavoz de En Marea nunha entrevista na Radio Galega. Falou tamén sobre o referendo en Catalunya, do que opinou que non ten efectos xurídicos pero si políticos.
"Os efectos políticos son claros. Existe unha vontade cidadá clara de decidir politicamente como queren organizar o seu goberno e polo tanto esa vontade política ten que ser respectada”, asegurou.