Vía Galega, a plataforma social en defensa dos dereitos nacionais de Galiza, conmemora o centenario da Asemblea Nacionalista de Lugo cun completo programa de actos que decorrerán o domingo, día 18 de novembro, na cidade de Lugo.
Vía Galega quere así poñer o foco nun feito que considera “central” na reivindicación de Galiza como “suxeito político” e na reclamación “da súa soberanía”.
Cen anos despois da asemblea que marcou o inicio do nacionalismo galego, a plataforma aprobará a “Carta de Dereitos do Pobo Galego”.
Os actos comezarán ás 10.45 horas, coa benvida ás persoas asistentes, no IES Lucus Augusti (Avda. Rodríguez Mourelo, s/n).
Entre as 11 e as 12.45 horas desenvolveranse as intervencións, amenizadas con música, e darase lectura á citada carta.
Ás 13 horas terá lugar a ofrenda floral no Hotel Méndez Núñez (rúa da Raíña, 1) e ás 13.15 horas a Muralla de Lugo acollerá a lectura de textos e mais o acto reivindicativo.
Fecharase o programa ás 14 horas coa interpretación do Himno nacional.