Desde a plataforma Vía Galega, que agrupa máis de 65 colectivos sociais e culturais, anímase a pendurar a bandeira galega de fiestras, varandas e galerías nesta semana de celebración do Día da Patria Galega.
Unha xornada, recolle a entidade nun comunicado de prensa, en que “milleiros de galegas e galegos defenden e reclaman os dereitos colectivos que lle corresponden á Galiza como nación e, por iso, é bo momento para exhibir os símbolos propios do país”.
Vía Galega pon de manifesto que avoga na súa programación pola “ampliación da conciencia nacional para conseguir o recoñecemento do exercicio do dereito de autodeterminación, para que Galiza dispoña de plenos dereitos democráticos e liberdades colectivas e individuais”.
Así, apela a “incrementar a plena capacidade política, sen subordinación a intereses alleos, para obter unha economía ao servizo do pobo galego que free o espolio dos nosos recursos, cree emprego de calidade e deteña a emigración, xunto con accións que normalicen a nosa lingua, cultura, deportes e ensino”.
Esta segunda feira, Vía Galega distribuirá en Compostela unha publicación conmemorativa do Día da Patria Galega e contará cun posto propio no Festigal, evento que organiza a Fundación Galiza Sempre no campus sur.
Precisamente, a plataforma en defensa dos dereitos nacionais e sociais da Galiza leva meses desenvolvendo unha intensa campaña para reivindicar que as seleccións deportivas poidan participar en competicións oficiais representando a nación. Unha reivindicación que mesmo chegou ao Parlamento da Galiza.
O pasado mes de abril, Vía Galega congregou en Compostela máis de 2.000 persoas que reclamaron "os dereitos políticos asociados á condición nacional da Galiza" e denunciaron "o espolio colonial" ao que se ve sometido o país. A manifestación, apoiada por máis de 60 colectivos, contou coa presenza de representantes da vida política, sindical e social da Galiza.