Xavier Vence participou esta cuarta feira en Bruxelas nunha conferencia organizada pola ALE da que tamén tomaron parte o president de ERC, Oriol Junqueras, e o coordenador de Aralar, Patxi Zabaleta.
O voceiro nacional do BNG defendeu no Parlamento europeo a necesidade de que Galiza conte con "ferramentas propias dun estado" na Unión Europea para gozar dunha "voz propia" perante as institucións e "defender os intereses" dos sectores produtivos galegos como o agro, a pesca ou o naval.
"Temos sobrados exemplos", explicou Vence, "de que Galiza perde cando é o Estado español quen negocia" en nome do pobo galego. Neste senso, o líder do Bloque asegurou que existen "sobrados exemplos" desta realidade como son, sinalou, a exclusión do Porto de Vigo do primeiro nivel das estruturas europeas ou o acordo pesqueiro recentemente aprobado entre a UE e Mauritania que "deixou fóra á frota cefalopodeira" galega.
Vence asegurou que a creación dunha "macrocoalición" das nacións sen estado ás europeas "avanza sen présa mais sen pausa"
Así, o voceiro nacional do Bloque dixo agardar "que o resultado das eleccións europeas" que terán lugar en maio de 2014 "supoña un avanzo das forzas nacionalistas de esquerda das nacións sen estado" e indicou que as negociacións para a construción dunha "macro-coalición" integrada por forzas homólogas ao BNG en Euskadi e Catalunya "avanzan sen présa mais sen pausa".
Aliás, acrecentou Vence, a Unión Europea debe contribuír "a recoñecer as aspiracións de soberanía de Galiza, Catalunya e Euskadi por respecto democrático", afirmou. Algo que xa se está a dar no caso de Escocia ou Flandes, salientou, "nun signo de normalidade democrática" do que dixo, "debe tomar nota o Estado español".