Sermos Galiza púxose en contacto con Rafa Cuíña, alcalde de Lalín e principal referente institucional de Compromiso, para que esclarecese os contidos do seu rechamante chío desta segunda feira en que deixaba entrever o seu hipotético abandono da militancia do partido.
Cuíña aproveitou o contacto para matizar as súas palabras.
"Non falo de abandonar o partido, mais si as responsabilidades de dirección no caso de se optar por unha solución, a de integrar unha lista de obediencia estatal, na que non acredito. Deixar a Executiva sería nese caso un acto de coherencia coas cousas que eu creo", dixo a Sermos Galiza.
Empezo a visualizar que en vista do espectáculo actual, quédame pouco nese proxecto que con tanta ilusión axudei a parir que é @euCompromiso
— Rafa Cuiña (@Rafiklalin) octubre 19, 2015
"Non gosto do espectáculo que está a dar todo o mundo. E cando digo todo o mundo, me refiro a todo o mundo. Eu -salienta- estou na coordenadora de Iniciativa pola Unión...", enfatiza coa intención de non deixar ninguén a salvo da crítica.
Interpelado sobre a que se refire cando fala de espectáculo, esclarece: "Hai conversas abertas e moitos actores. Non aturo que se diga unha cousa de frente e logo por detrás se faga todo o contrario. Este proceso ten que facerse desde abaixo e non nas cúpulas. A xente quere unha lista de unidade e eses actores dos que falo están a defraudar a xente".
Fontes da dirección de Compromiso aseguraron a Sermos que na dirección da organización Cuíña é o único político que defende unha lista de obediencia exclusivamente galega. "Iso non é certo", retruca o alcalde de Lalín.