O presidente da Deputación de Ourense, Manuel Baltar foi multado, segundo informou este xornal, en até dúas ocasións na mesma viaxe. O 23 de abril na A-52, á altura de Allariz, o presidente do PP ourensán foi detectado por un radar conducindo a 173 quilómetros por hora nun tramo limitado a 120.
Nesa mesma viaxe, foi ‘cazado’ a 215 quilómetros por hora, ademais, nun coche oficial da Deputación.
Nesta ocasión, segundo informou a Cadena Ser, saíron á luz outras tres multas por exceso de velocidade dun dos vehículos que ten asignados ao seu servizo Manuel Baltar.
As multas
A primeira das infraccións tivo lugar en maio de 2019 e identificouse como condutor Raúl Domarco Piñeiro, responsábel do parque móbil de Presidencia da Deputación e chofer de Baltar.
A segunda infracción, segundo indica a Cadena Ser, foi en abril de 2021 e nela detectouse un coche oficial conducindo a 179 km/h. Nesta ocasión a Deputación orensá identificou como condutora a filla do responsábel do parque móbil, Laura Domarco Álvarez.
Finalmente en marzo de 2022, o mesmo vehículo foi identificado a 171 km/h e desta vez conducía a muller do responsábel do parque móbil de Presidencia, María José Álvarez Rodríguez.
O presidente da Deputación de Ourense aínda non deu explicacións acerca desta información.