Cañete e Valenciano pronunciaron o nome de Asturias e non o de Galiza cando se referiron á situación do sector pesqueiro.
A candidata do PSOE, para rebater a suposta mellora da pesca no Estado aducida por Cañete, dixo que "os pescadores asturianos non pensan iso". O candidato conservador dixo, para pór fin á cuestión, que "toda España está pescando moito máis, mesmo Asturias, que está a pescar moita máis caballa".
Nen unha soa referencia á redución das cotas de captura para a frota galega, nen unha soa referencia aos problemas do sector lácteo galego e nen unha soa referencia á situación do sector naval de Galiza, moi condiciona por decisións adoptadas en Bruxelas.
Deu toda a impresión de que as equipas de campaña de PP e PSOE combinaron non tocar no debate de forma aberta nen o asunto Bárcenas nen o tema do goberno de coligación
"A direita está fracturando Europa", espetou Valenciano, que nese momento finxiu ignorar que con esa direita gobernan os socialdemócratas en Alemaña e que os seus correlixionarios en Franza están a aplicar as mesmas receitas que os neoliberais.
Valenciano aproveitou para reivindicar os supostos logros dos ex presidentes de goberno socialistas. "Quen meteu o Estado español na UE foi Felipe González. Quen meteu o Estado español no G-20 foi Zapatero. Vostés o único que fixeron foi meternos nun conflito bélico", dixo.
Cañete, aliado de Felipe González
Nese momento emerxeu o Cañete aliado de Felipe González, recentemente unidos na defensa dun futuro goberno de concentración PP-PSOE. "Non discuto os méritos de Felipe González, dixo Cañete, "o que digo é que vostés foron irrelevantes con Zapatero en Europa".
Deu toda a impresión de que as equipas de campaña de PP e PSOE combinaron non tocar no debate de forma aberta nen o asunto Bárcenas nen o tema do goberno de coligación. Sobre a corrupción Valenciano limitouse a brincar cunha vaga referencia á afeizón dos dirixentes do PP a viaxaren a Suíza.