ÁNGEL GARCíA SEOANE, 'GELO'

“Sufrín a miña primeira derrota en Alternativa dos Veciños. Tiña a certeza de presentarme”

A asemblea da formación desbotou a proposta de concorrer ás eleccións galegas con García Seoane como candidato, o que lle obrigaría deixar a alcaldía que ostenta desde 1985. “A xente quixo que seguirse como rexedor”.

Ángel García Seoane. 18 de abril de 2016

Alternativa dos Veciños decidiu esta cuarta feira non concorrer ás eleccións galegas. A consulta ás bases da formación deu como resultado unha maioría a favor de non dar este paso. Foron 114 os votos que responderon Non á pregunta “Está vostede a favor de que Ángel García demita como alcalde para presentarse como candidato por Alternativa dos Veciños á Xunta de Galiza ?”. O Si foi a opción riscada por 45 persoas e a abstención a escolla do 2, aliás de 3 sufraxios en branco.

- Como valora a decisión adoptada pola asemblea de Alternativa dos Veciños de que a formación non concorra ás eleccións?

- Creo que sufrín a primeira derrota da miña historia dentro de Alternativa dos Veciños. Tiña a certeza de presentarme ás galegas e estaba convencido de que ía ser posíbel, mais a asemblea decidiu o contrario. Non se trataba de ser deputado, é 50.000 veces mellor ser alcalde de Oleiros. Mais despois das eleccións galegas pode darse un escenario onde un só deputado poida ser decisivo e ese deputado si que tería moito que dicir e pode obrigar a aplicar así políticas en Galiza que non se aplican. Mais a xente quixo que seguise de alcalde. A democracia é así, nós somos asemblearios e a asemblea decidiu.

- A lei establece que para ser candidato á Xunta ten que deixar a alcaldía. Que lle parece esa obriga?

- Esa foi unha cousa que instaurou Fraga para evitar que Paco Vázquez, daquela alcalde da Coruña, se presentase. Eu, desde logo, non estou de acordo con ese requisito, non é democrático. Non ten moito sentido ter que deixar a alcaldía para poder presentarse a unhas galegas. Ese requisito é algo que só hai en Galiza, non no resto do Estado.

- A asemblea decidiu que seguise como alcalde. Meditou xa se esta vai ser o seu derradeiro mandato?

- Eu estou en contra deses políticos que din que só se pode estar dúas lexislaturas. Quen marca e decide cantas vas estar é a xente, é o pobo co seu voto. Levamos 10 lexislaturas na alcaldía e nesta última foi cando máis votos tivemos, un 61,5%. Durante todos estes anos presentáronme 16 querelas criminais e ningunha puido comigo, queríanme quitar de alcalde.

- Alternativa non se presenta ás galegas. Cre que o panorama político fica completo coas forzas que si anunciaron que ían concorrer a esa cita coas urnas?

- Os partidos políticos, independentemente do signo político, teñen que mudar certas cousas, a xente pide iso. Nestas eleccións o nacionalismo está representado polo BNG, as marés van ocupar un espazo da esquerda e o PSOE o da socialdemocracia. o PP vai ter nestas eleccións a súa marca branca, Ciudadanos. 

Comentarios