—Participou recentemente no I Encontro de Alcaldesas. Segue a ser un territorio difícil para as mulleres a Alcaldía?
A Alcaldía é un territorio difícil sempre, xa que as alcaldesas e os alcaldes somos os responsábeis políticos máis próximos á cidadanía. Hai un plus de dificultade por ser muller? Si, como en todos os ámbitos da sociedade. Por iso o feminismo segue sendo tan necesario como sempre.
—Narón, a oitava cidade da Galiza, máis que nunca aparece nese grupo coa Coruña, Santiago… que necesidades ten a cidade?
Narón é a oitava cidade da Galiza encabezando o grupo de municipios que non teñen esta consideración histórica, pero que claramente son importantes territorios urbanos a día de hoxe. Os concellos de máis de 20.000 habitantes supomos máis de 16% da poboación galega e como tal compartimos unha serie de necesidades específicas que as grandes cidades si teñen máis ou menos resoltas. Podemos falar do transporte urbano e interurbano ou do financiamento.
—Coa pandemia os concellos asumiron máis servizos, pero o financiamento segue a ser un dos seus puntos febles. Que se pode facer ao respecto?
Si, durante a pandemia asumimos moitas máis competencias das que nos correspondían, o que xerou enormes tensións. Os concellos fomos a primeira barreira de contención e iso puxo o sistema en continuas situacións de dificultade.
Houbo que derivar recursos inicialmente previstos para outros ámbitos a combater os efectos da pandemia. Ademais, a actuación das Administracións supramunicipais moitas veces foi improvisada ou pouco planificada, impulsando normas e restricións que coñeciamos no mesmo momento en que entraban en vigor, sen marxe para tomar medidas.
Evidentemente, esta situación puxo negro sobre branco a necesidade de revisar o financiamento municipal, que xa era insuficiente con anterioridade.
—Que proxectos fican por desenvolver en Narón?
Temos en marcha importantes proxectos que, se todo vai ben, veremos rematados pronto. Aí está a rehabilitación, posta en valor e musealización do muíño de Xuvia, unha das nosas xoias patrimoniais.
Tamén están en marcha as obras de conexión dos paseos de Freixeiro e Xuvia mediante unha senda peonil e ciclista, o que permitirá gozar dun enorme espazo verde en pleno Narón.
—Terra Galega impulsa a iniciativa Cóntanos!, para coñecer as opinións e necesidades da cidade. Que valoración fai desa iniciativa?
Trátase dunha iniciativa que, con diversas denominacións e matices, facemos asiduamente en cada mandato. Queremos achegarnos a todos os barrios e parroquias e escoitar de primeira man a veciñanza: as cousas que van ben, as que non van tan ben. Así que a valoración sempre é positiva porque sempre é positivo escoitar as túas veciñas e veciños.
—Que papel deben ter as cidades, e o concello de Narón entre elas, na Galiza do século XXI?
As cidades deben ser lugares nos que se presten todos os servizos que a cidadanía necesite.
Deben ser espazos cada vez máis humanizados. As cidades, por tanto, deberán estar dotadas de amplos espazos verdes, favorecer formas de mobilidade alternativas, ser eficientes enerxeticamente e responsábeis co medio ambiente e mais cos seus habitantes.