Sada é o primeiro concello da Galiza que aproba unha moción solicitando que se cree unha comisión de investigación sobre o rei emérito español, Juan Carlos de Borbón, e que este devolva o diñeiro recibido de fondos públicos.
Así o sinalan a Nós Diario desde a plataforma ‘Galiza pola República’, impulsora da moción debatida na sesión plenaria destas quinta feira en Sada e que saíu adiante co voto de Sada Maioría, BNG e Alternativa dos Veciños, as tres formacións que a presentaron. O PSOE abstívose e o PP votou en contra.
Esta moción foi rexeitada no pleno do Concello da Coruña en agosto cos votos de PP e PSOE mais en Sada os socialistas optaron por se abster.
Desde ‘Galiza pola República’, plataforma que agrupa diferentes organizacións políticas, sindicais e colectivos sociais, salientan a importancia deste paso e indican que abre as portas a presentar esta moción en máis concellos galegos.
No texto da iniciativa aprobada na sesión plenaria “condénase a fuxida de Juan Carlos I” e ínstase ao Goberno español a que cree unha comisión de investigación “sobre os ingresos do rei emérito en concepto de comisións e outras actividades”.
Ademais, pídese ao Executivo estatal que retire o título de rei emérito a Ju7an Carlos I e que “inicie os procesos necesarios” para que se leve a cabo un “referendo” sobre a forma de Estado.