POLÍTICA

Rueda, elixido sexto presidente da Xunta, promete "continuidade da boa"

Investidura de Rueda

Rueda, elixido sexto presidente da Xunta, promete "continuidade da boa"

Alfonso Rueda foi investido onte no Parlamento presidente da Xunta da Galiza, o sexto da etapa autonómica, após ser elixido co si de 41 deputados do PP e 33 en contra da oposición. "Quero gobernar para toda a Galiza", dixo o novo titular da Presidencia, que tomará posesión oficial do cargo mañá sábado. Ana Pontón presentou os eixos do programa do BNG para o Goberno "do cambio que vén" e Luís Álvarez (PSdeG) ofreceu diálogo ao novo presidente. 

rueda presidente foto @alfosnorueda
photo_camera (Foto: @AlfonsoRuedaGal)

A elección de Alfonso Rueda non disipa a sensación de que máis que ante o inicio dunha nova etapa política na Galiza cun novo presidente á fronte estase ante o tramo final de lexislatura cun simple cambio de titular na Xunta. Unha sensación que as propias intervencións de Rueda nas dúas xornadas da sesión de investidura encargáronse de alimentar, a teor da valoración feita pola oposición. "Esgotado", "pasado", "gris", "baleiro"... Os cualificativos do BNG e PSdeG sobre o discurso do candidato —agora xa elixido presidente— non eran precisamente de entusiasmo. Ambas as dúas formacións expuxeron onte antes da votación as súas respectivas propostas alternativas de Goberno, ás que o portavoz do PP, Pedro Puy —que tivo que se ausentar do Pleno por un infarto— situou como "antagónicas", intentando poñelas como exemplo de que nacionalistas e socialistas non serían quen de se entender. Non hai alternativa posíbel ao PP, veu dicindo, nunha mensaxe que o PP repite desde hai tempo procurando que calle.

Un cambio que xa está "en marcha"

A líder da oposición, Ana Pontón, subiu á palestra para confrontar esa mensaxe e situar o día de onte no marco dun proceso de "cambio galego" que xa está en marcha. Defendeu que "é posíbel" unha Galiza "mellor" que a que deixan estes 13 anos de Gobernos de Feixoo e que vai continuar Alfonso Rueda.

"Neste debate estamos ante dous modelos", afirmou Pontón, o do PP e o do BNG —"o vello ou o novo; o pasado ou o futuro"— e o nacionalismo "está preparado para gobernar". Debullou os 10 "obxectivos estratéxicos" que conforman o proxecto do BNG para gobernar a Galiza, do reforzo dos servizos públicos, ao impulso económico e laboral, do pulo ao autogoberno á relación con Portugal... "Comezou a conta atrás para un cambio de goberno que o BNG quer liderar", concluíu a portavoz. A súa intervención foi seguida con comentarios de desaprobación entre as bancadas do PP, polo que o presidente da Cámara, Miguel Santalices, tivo que pedir silencio. Pontón foi, ademais, albo das críticas máis duras de Alfonso Rueda no debate, no que mesmo a acusou de estar nunha "investidura dos mundos de yupi". 

A nacionalista reiterou que "hai outra maneira de entender o país" diferente á do PP e que pasa pola confianza nas capacidades dos galegos e galegas. Rueda, na súa quenda de resposta, apelou ao "todos somos España" e a pedir "lealdade" ao rei Felipe VI fronte a propostas "rupturistas".

Man tendida

Luís Álvarez (PSdeG) tendeu a man a Alfonso Rueda "para resolver os problemas da sociedade galega". O portavoz parlamentar da formación socialista era consciente de que tiña que buscar un discurso propio para evitar pasar desapercibido entre o candidato a presidente a líder da oposición. 

Crítico coa xestión do PP na súa primeira intervención, na segunda quenda trasladou a Rueda "unha oferta de diálogo do PSdeG". Cal e area. Advertiu a Rueda que malia "a inoperancia" do PP ao longo destes anos a Galiza "funcionaba" e que os galegos, "tan pronto se convoquen eleccións", darían "carpetazo" ao Partido Popular.

Máis do mesmo

O PP, pola súa parte, como non podía ser doutra maneira, mostrou o seu apoio á candidatura de Rueda e o programa de Goberno que este presentou a pasada terza feira. Pedro Puy acusou o BNG e o PSdeG de "distorsionar o debate" ao asistir á sesión de investidura para presentar os seus respectivos programas de Goberno alternativos. "Como eses familiares lonxanos que aparecen na voda para roubarlle o protagonismo aos que casan", comparou.

Alfonso Rueda, minutos antes da votación, reiterou unha mensaxe que xa deixou clara nestas semanas, a de que "a nova etapa non estará marcada pola ruptura. Será continuidade da boa". 

Por se ficaba algunha dúbida, volveu proclamar o seu "orgullo" polo feito nestes 13 anos da man de Alberto Núñez Feixoo. Ratificada a elección parlamentar de Alfonso Rueda, Ana Pontón, e Luís Álvarez saudaron o novo presidente. Agora, o presidente da Cámara enviará unha comunicación telemática oficial da súa elección ao rei Felipe VI. E mañá, sábado, toma de posesión.

Pedro Puy sufriu un infarto durante a sesión de investidura

O portavoz parlamentar do PP, Pedro Puy, sufriu unha síndrome coronaria aguda no debate de investidura e foi trasladado ao Hospital Clínico Universitario de Santiago, onde foi sometido a unha anxioplastia (introdución dun catéter até a arteria obstruída do corazón). Está ingresado na UCI, xa estabilizado, onde permanecerá uns días. Foi este o momento máis crítico da xornada e todos os participantes no debate desexaron unha pronta recuperación ao popular. No transcurso da sesión tamén houbo tempo para citar letras de cancións como a Coti e o seu "Hai días eternos que amencen esgotados" (Luís Álvarez); ou aquela de "Non é amor é obsesión" (Ana Pontón). A portavoz do BNG mesmo se preguntou que pode ser iso do 'estilo Rueda' e deu tres alternativas do que significa: "Ante un problema invéntate un dato; ante un problema, compárate cos que están peor e, se estas dúas non funcionan, ante un problema, bótalle a culpa ao Bloque". Álvarez asegurou que podía resumir o discurso de Rueda en tres palabras ("Vaia por deus!") e Pedro Puy (PP) mesmo ironizou cunha investidura na que malia haber só un candidato, a oposición parecía presentarse como tal.

comentarios