Consello da Xunta

Rueda apoiaría a supresión do Ministerio de Igualdade

O Goberno galego está en campaña electoral e percíbese. Neste sentido, enténdense os temas seleccionados para a rolda de prensa posterior ao Consello da Xunta da esta quinta feira, onde Alfonso Rueda aproveitou para xustificar algunhas das propostas máis polémicas do PP.
Alfonso Rueda, nos corredores de San Caetano. (Foto: Arxina)
photo_camera Alfonso Rueda, nos corredores de San Caetano. (Foto: Arxina)

Rueda defendeu esta quinta feira a proposta de Alberto Núñez Feixoo de suprimir o Ministerio de Igualdade. O mandatario galego explicou que o seu xefe de filas apostou por eliminar o Ministerio de Igualdade se chega á Presidencia do Executivo do Estado, pero creando "un departamento dentro doutro ministerio". Neste sentido, asegurou que "o que dixo Alberto Núñez Feixoo é que pode sobrar burocracia, pero en ningún caso o que sobran son políticas de igualdade. Mesmo con menos burocracia, ás veces se potencian resultados".

O mandatario galego puxo Feixoo como exemplo en materia de políticas de igualdade. Nesta liña, manifestouse "absolutamente convencido" do "compromiso" do seu antecesor no cargo coas políticas de igualdade e insistiu en que “aí non podía haber ningunha dúbida”. Ao tempo, criticou as alternativas defendidas desde o Executivo do Estado e ironizou con que “o logro máis grande que lle coñecemos é a Lei do 'só si é si', que tivo que ser emendada, e menos mal, polo propio Goberno”.

O presidente da Xunta defendeu racionalizar a “burocracia e o gasto” após presentar unha proposta para financiar até 50% as vacacións a aqueles menores de entre 18 e 30 anos que decidan facer o Camiño de Santiago. O programa, denominado Xacobeo Xove, ofrecerá “descontos de até 200 euros como máximo para cubrir gastos en aloxamento e manutención en estabelecementos turísticos do Camiño, co obxecto de fomentar as rutas xacobeas entre as novas xeracións”.

Por outra parte, o xefe do Executivo galego anunciou que “a Xunta iniciará a vindeira semana o proceso de captación de investimentos privados para a creación da sociedade mixta”, de carácter “público-privado”, cuxo obxectivo é que "os beneficios socioeconómicos do aproveitamento de recursos naturais -como os que fan uso intensivo da auga, as iniciativas mineiras ou as enerxías renovábeis- revertan na Galiza”.

Rueda sinalou que o Goberno galego, “á hora de seleccionar as empresas que conformen a sociedade mixta”, terá en conta “o arraigo na Galiza”, “que teñan aquí o centro de decisións e xeren riqueza na nosa terra” e que “a súa fonte principal de ingresos non sexan as actividades enerxéticas”. O modelo de sociedade defendida pola Xunta foi, xa, rexeitado polas forzas da oposición.

Convocatoria MIR

O mandatario galego aproveitou o seu encontro cos medios para presumir de política sanitaria. Neste sentido, afirmou que “o número de prazas de formación sanitaria na Galiza non deixou de medrar desde 2012” e destacou que o Goberno galego aprobou na súa reunión desta quinta feira “a maior oferta de prazas de formación sanitaria da historia da Galiza para o exercicio 2023-2024”.

Así, anunciou a convocatoria de 207 prazas de médico de familia e 52 de enfermaría de Atención Primaria. Porén, 1.533 médicos de familia xubilaranse até 2026 e 1.526 marcharon para traballar fóra do Estado desde 2010.

Falla de fondos para Altri

Alfonso Rueda cualificou de "sorprendente" e "inexplicábel" a decisión do Goberno do Estado de non incluír Altri dentro das propostas a financiar a cargo do programa Next Generation. Nesta liña, afirmou que o Executivo estatal non tiña "ningunha intención" de apoiar este proxecto "tan importante e tan potente".

O mandatario galego sinalou que "é unha demostración máis de que por prexudicar as opcións do que espero que sexa o próximo presidente do Goberno (Alberto Núñez Feixoo) non pasa nada por prexudicar a Galiza". Ao tempo, revelou que falou esta cuarta feira co ministro de Industria, Héctor Gómez, para pedirlle que "manteña" a súa "promesa" á marxe das eleccións estatais, xa que "hai cousas que non poden nin deben esperar e deben ficar á marxe de conxunturas políticas".

As declaracións de Rueda producíronse após, na terza feira, a ministra de Asuntos Económicos, Nadia Calviño, asegurara que o proxecto de Altri non cumpre cos criterios da Comisión Europea (CE) para recibir axudas públicas procedentes do programa Next Generation. Neste dirección, excluíu a pasteira da solicitude de fondos comunitarios remitida nesta semana á Comisión Europea, polo que a deixa fóra das liñas de financiamento extraordinario comunitario.

Comentarios