“Non é unha cuestión de que non quera demitir, é que non debo. Primeiro porque os documentos que aprobamos 85.000 persoas en Vista Alegre [congreso do partido, reférese á consulta telemática posterior] din que non debo demitir; e segundo porque a política da chantaxe e da presión é algo do que Podemos ten que fuxir”, afirma o aínda secretario xeral da organización podemita galega.
Chantaxe e presión son termos duros e con eles reférese Breogán Riobóo a medidas adoptadas desde a cúpula estatal do seu partido para o forzar a deixar o cargo. El non o vai facer porque se sente lexitimado para continuar ao ter sido eleito en primarias.
Riobóo sempre pasou por ser un dirixente próximo a Carolina Bescansa, a compostelá que ocupa a secretaría de programas estatal e que cofundou a organización con Iglesias e Errejón
![Publicidade 195634]()
Riobóo sempre pasou por ser un dirixente próximo a Carolina Bescansa, a compostelá que ocupa a secretaría de programas estatal e que cofundou a organización con Iglesias e Errejón. El esfórzase agora por transmitir a idea de que mantén o seu apoio. E así, perguntado a respeito de se o respalda no confronto que dirime co líder do partido, o secretario xeral galego afirma que Bescansa “mostrou acordo no plantexamento de poder debater e poder decidir conxuntamente a rota de Podemos Galiza para as autonómicas”.
O conflito xurdiu ao non dar por suposto Riobóo a continuidade da fórmula de En Marea para as eleccións galegas e ao postular que debían ser as persoas inscritas en Podemos Galiza as que determinasen se a organización vai en coligazón a eses comicios ou os afronta coa súa propia marca.
