O Colectivo Rexurdir Podemos mostrou esta sexta feira o seu “total desacordo coa eventual presenza do deputado Antón Gómez Reino e do Coordinador de Podemos Galicia, Borja San Ramón, na presentación do proxecto de Yolanda Díaz [Sumar] o próximo día 2 de abril”.
Peticións do partido
Desde Rexurdir Podemos din estar en desacordo coa presenza de San Ramón e Gómez Reino no acto “se antes non se cumpren as peticións do noso partido tal e como propón a dirección política e orgánica de Podemos encabezada pola nosa compañeira Ione Belarra”.
“Entendemos que a súa presenza, en caso de confirmarse, (pois foi condicionada polo noso Coordinador na reunión do Consello Cidadán de Podemos Galicia, decorrido o pasado día 26 do corrente mes, á existencia dun acordo xeral entre ambas as partes) suporía un acto de deslealdade inadmisíbel xa que impugnaría a posición do noso partido”, manifestan.
“Responsabilidade militante”
A través dun comunicado, Rexurdir Podemos apela publicamente “á responsabilidade militante de Borja San Ramón e Antón Gómez Reino co fin de evitar a fractura do noso partido na Galiza”.
“Rexeitamos así mesmo, en caso de confirmarse a súa asistencia, tentar lexitimar esta traxectoria que leva a debilitar a dirección estatal en base ao feito de gañar unhas votacións , cuxa finalidade foi a de elixir unha representación de carácter orgánico”, acrecentan.