Agora tócalle á Mesa do Congreso decidir se acepta esta división do Grupo Mixto, no que permanecerían a CUP, Unión del Pueblo Navarro e Foro Asturias.
Ao peche desta edición, as formacións políticas implicadas neste Grupo Parlamentario Plural descoñecían a data na que se reunirá o órgano de Goberno da Mesa da Cámara Baixa para tratar este asunto. Porén, fontes próximas a estes partidos sinalaron a Nós Diario que a decisión "debería" ser comunicada ás partes antes de que se celebre unha primeira sesión de investidura.
Sobre este grupo unificado por criterios de "operabilidade", como indicou desde o primeiro momento o deputado do BNG en Madrid, Néstor Rego, tamén se pronunciou a portavoz nacional da formación nacionalista, Ana Pontón, para salientar que o grupo "cumpre estritamente os requisitos" para recibir o visto bo da Mesa.
"Non hai lugar para que non o poidan aprobar", manifestou Pontón para destacar que a decisión de configurar un grupo "instrumental" xunto con outras formacións fora do Mixto só obecede á posibilidade de poder traballar cunha maior operatividade na súa acción parlamentaria e así "defender da mellor forma Galiza".
Ao cumprir co mínimo de 15 deputados e deputadas que estabelece o regulamento para a formación dun grupo parlamentario, os asinantes agardan que a Mesa autorice a súa constitución nunha reunión ao comezo da vindeira semana.
