A transferencia de competencias á Galiza segue a estar na axenda do Bloque Nacionalista Galego, que esta quinta feira reivindicou a necesidade de “reactivar” a comisión mixta formada polo Goberno do Estado e o da Xunta para falar deses traspasos que están á espera, tales como a AP-9.
O deputado do BNG no Congreso, Néstor Rego, explicou que fican sen rematar acordos en materia de transportes, tráfico e seguridade viaria e pública, entre outras.
Por esa mesma razón, e co foco posto especialmente no cambio de xestión da autoestrada que conecta o norte e o sur do país, di que os intereses da Galiza chocan “co desinterese das forzas estatais”.
Por exemplo, no caso da AP-9, “sen dúbida a reclamación máis sentida” por galegos e galegas, mantense no aire. O nacionalista insiste en fixar un encontro para “pór fin á estafa legalizada” que supón o uso desta infraestrutura.
Neste caso, Rego considera que hai “máis de cinco anos de demora” no cambio solicitado por toda a “cidadanía galega”.
En calquera caso, advirte de que o diálogo sobre a autoestrada “non debe obstaculizar” o traballo nese senso ou a prol doutras transferencias.
Desde o punto de vista do representante do Bloque, “en 12 anos de goberno” de Alberto Núñez Feixoo na Galiza, o seu Executivo non recibiu “nin unha soa competencia”, algo que atribúe a unha política "deliberada" de "minguar a capacidade" da Galiza "para decidir sobre os seus asuntos".
