Co obxectivo de que se suspenda a concesión da autoestrada AP-9 e de que pase a estar “libre de portaxes”, o deputado do BNG no Congreso, Néstor Rego, anunciou na sexta feira que levará á Cámara Baixa unha serie de iniciativas, a raíz de que Bruxelas declarara ilegais as sucesivas prórrogas das concesións.
Rego cualificou de “absolutamente escandaloso e coñecido" o determinado pola UE pola forma coas que se outorgaron as prórrogas.
"Houbo actuacións que discriminaron á Galiza”, subliñou, á vez que lembrou como outras infraestruturas da mesma xeración da AP-9 finalizaron as súas concesións e estas "non foron prorrogadas".
No caso da Autoestrada do Atlántico, Rego cargou tanto contra a prórroga de 10 anos aprobada polo Goberno de Felipe González como contra a de 25 anos que acordou José María Aznar.
De non producirse estas operacións, a concesión "acabaría en 2013", recalcou o deputado nacionalista.
Por tanto, agregou, trátase "dun saqueo ilegal a todos os galegos e galegas, que levamos pagado xa oito anos o que non teriamos que pagar”.
A UE considera que é ilegal pola forma das devanditas prórrogas, pero Rego instou ás institucións comunitarias a que "profunden máis".
Así mesmo, o deputado do BNG no Congreso lembrou que hai unha lei en trámite nesta Cámara co obxectivo de que sexa "de titularidade galega".
Precisamente, as negociacións entre Rego e o PSOE en relación á investidura de Pedro Sánchez como presidente do Goberno español, deron como froito importantes descontos na AP-9.
