Fin ao pacto de Goberno en Vilalba tras 11 meses de bipartito. PSOE e a marea local, Vilalba Aberta, emitían nas últimas horas candanseu comunicado no que daban por acabado o acordo que permitía gobernar o PSOE nunha vila até entón sempre gobernada pola dereita. A elección como alcaldesa da socialista Elba Veleiro rachaba con 40 anos de goberno da dereita.
O motivo da ruptura é a “perda de confianza” do PSOE no concelleiro de Vilalba Aberta Modesto Renda, cabeza de lista de VA nas municipais de 2019, onde esta formación atinxiu 2 representantes.
Os socialistas indican que se propuxo que a outra concelleira de VA asumise as competencias delegadas até agora en Renda, como Turismo e Comercio Local, mais a asemblea de Vilalba Aberta rexeitou esa posibilidade.
